कञ्चनपुरको दैजी–बेल्डाँडी सडकबाट चिप्लीएर बस दुर्घटना

– पहिलाद राना
महेन्द्रनगर, २१ फागुन । कञ्चनपुरको दैजी–बेल्डाँडी सडक खण्ड अन्तर्गत बीच जंगलमा बस दुर्घटना भएको छ ।
आईतबारदेखि परेको बर्षाले बिग्रीएको कच्ची सडकमा बस चिप्लिएर नहरमा खस्दा दुर्घटना भएको हो । जिल्ला प्रहरी कार्यालय कञ्चनपुरका प्रहरी प्रमुख विश्व निरन्जन प्रधानले बुधबार बिहान महेन्द्रनगरदेखि बेलौरीका लागि छुटेको पवनदुत यातायातको ना ४ ख ५९२ नम्बरको बस बीच जंगलमा दुर्घटना भएको जानकारी दिनुभयो ।
दुर्घटनामा परी एक जना घाईते भएको प्रहरीले जनाएको छ । घाईते हुनेमा बेल्डाँडीका कृष्ण भट्ट रहेका छन् । उनको बेल्डाँडी प्रथामिक अस्पतालमा उपचार भईरहेको प्रहरीले जनाएको छ । चालक फरार रहेको प्रहरीले जनाएको छ ।
प्रहरीका अनुसार चालकको लापरबाही, गाडीमा खराबी आएका कारण र कच्ची सडकमा चिप्लिएर पनि बस दुर्घटना भएको हो । चालक फरार रहेकाले थप कारबाही हुने प्रहरीले जनाएको छ । जंगलमा दुर्घटना हुँदा यात्रुहरु भने अलपत्र परेका थिए । यात्रुहरु पैदल घर गएका थिए ।
सोही बसमा सवार यात्रु खेम घटालले कच्ची सडकमा गाडी चिप्लिएर एका एक दुर्घटनामा परेको बताउनुभयो । ‘कच्ची बाटो छ, गाडीका पार्टपूर्जाहरु निस्किए त्यसपछि चालकले नियन्त्रण गर्न सकेन, दुर्घटना भयो ।’, उनले भने ।
कच्ची सडकमा सवारी साधन हाँक्न कठिन हुने भएकाले दुर्घटना हुने सम्भावना बढी हुने यातायात व्यवसायीहरुको भनाई छ । यातायात व्यवसायी विष्णू सिंहले कच्ची सडकमा उस्तै पनि सवारी साधन हाँक्न धेरै कठिन हुने र पानी परेकाले चिप्लिने भएकाले चालकले अत्यन्तै सम्वेदनशिल हुनुपर्ने बताउनुभयो ।
बेल्डाँडीका अगुवा युवा मदन भट्टले राज्यको कमिकमजोरीका कारण दैजी–बेल्डाँडी सडक खण्डमा दुर्घटना भएको बताउनुभयो । कच्ची सडकखण्ड भएकाले सवारी साधन दुर्घटना भएको उहाँको भनाई छ ।
दक्षिणी क्षेत्रका समाजसेवी विमल धामीले राज्यको कमीकमजोरीका कारण कच्ची सडकमा नियन्त्रण गर्न नसकेर गाडी दुर्घटना भएको बताउनुभयो । ‘कच्ची सडक पक्की नबनाउदा, र हामीहरुले पटक पटक यो सडकमा आपसे आप सवारी साधन दुर्घटना हुन्छन, भन्दा पनि सम्बन्धीत निकाय भने कानमा तेल हालेर बस्यो, जसको परिमाण आज दुर्घटना भयो ।’, उनले भने ।
दुर्घटना भएपछि एकले अर्केलाई दोष दिनु भन्दा पनि समयमै दुर्घटना न्यूनिकरणका उपायाहरु अपनाउनु उत्तम हुन्छ । स्थानियहरुले सो सडक कालोपत्रे पटक पटक माग गरेपनि सम्बन्धीत निकाय भने मौन बसेका छन् ।