विराटनगर, ११ फागुन । उपप्रधान तथा स्थानीय विकासमन्त्री प्रकाशमान सिंहले एकीकृत नेकपा माओवादी नेतृत्वको ३० दलिय मोर्चाले फागुन १६ गते आयोजना गरेको आन्दोलनमा हिंसात्मक गतिविधी गरेको पाइएमा सरकारले कारवाही गर्ने चेतावनी दिनुभएको छ ।
उहाँले एमाओवादी वार्ता नआएर ठुलो गल्ति गर्दैछ भन्नुभयो । एमाओवादीले शान्तिपूर्ण आलगायतका दललाई आन्दोलन छोडी वार्तामा आउन आह्वान समेत गर्नुभयो ।
विराटनगरमा सञ्चारकर्मीसँगको सङ्क्षिप्त भेटघाटमा उहाँले एमाओवादी लगायतका दललाई चित्त बुझाएर सहमतिमा ल्याउने प्रयास भइरहेको जानकारी दिँदै सहमतिको नाममा संविधान निर्माणको काममा ढिलाइ नगर्ने बताउनुभयो ।
उहाँले भन्नुभयो– “सबै राजनीतिक दलको सहमतिमा बनेको नियमावलीअनुसार प्रक्रियाबाट संविधान निर्माणको कार्य चाँडो टुङ्ग्याउन कार्यतालिका परिवर्तन गर्नेछौँ । प्रक्रियाबाट पनि संविधान निर्माणको काम अझै चार/पाँच महिना लम्बिन सक्छ ।”
संविधान जारी भएपछि वर्तमान सरकारले राजीनामा दिने स्पष्ट गर्दै उहाँले फागुन १६ गतेदेखि गर्ने भनिएको आन्दोलन शान्तिपूर्ण नभए सरकारले कानुनबमोजिम कारबाही गर्ने बताउनुभयो ।
प्रतिक्रिया