काभ्रे, ११ मंसिर । नेपालमा ८३ वटा सामुदायिक विद्यालय बनाइसकेका जापानीज नागरिक इसिमारु योजिरोको नेतृत्वमा काभ्रेको विकट गाविसमा नयाँ विद्यालय भवन निर्माण गरिएको छ ।
नेपालका विकट गाउँ बस्तीमा ‘स्कूल बाजे’का नामले परिचित इसिमारुको संस्था एसिया फ्रेण्डसिप नेटवर्कको अगुवाईमा काभ्रेको सस्र्युखर्क गाविसको डाँडागाँउस्थित बालकल्याण निम्न माध्यमिक विद्यालयमा ३ कोठे २ तले पक्की भवन निर्माण गरिएको हो । जापानको डियर्स कम्पनीले आर्थिक सहयोग गरेको यस विद्यालय भवन बुधबार एक समारोहका बीच हस्तान्तरण गरिएको छ ।
२२ लाख रुपैयाँ जापानीज संस्थाको सहयोग तथा विद्यालयको आन्तरिक स्रोतको समेत प्रयोग गरि २९ लाख रुपैयाको लागतमा भवन निर्माण गरेको हो । सहयोग रकम मध्ये २० लाख भवन निर्माण तथा २ लाख फर्निचरका लागि सहयोग गरेको डियर्सका प्रतिनिधि हिरोकाजूले बताए । उनले भने– ‘हाम्रो कम्पनीमा बार्षिक आम्दानीको १ प्रतिशत मात्रैले यो स्कुल भवन बनाइएको हो ।’ कार्यक्रममा जापानीज संस्था डियर्स र जापानस्थित जोइन एजुकेशनल सपोर्ट सोसाइटीका अधिकारीहरु पनि उपस्थित थिए ।
जापानका विभिन्न संघसंस्थाको सहयोगमा एसिया फ्रेण्डसिप नेटवर्कले नेपालको १४ वटा जिल्लामा ८३ वटा स्कुल भवन बनाइसकेको नेटवर्कका दक्षिण एसिया प्रतिनिधि गणेशमान लामाले जानकारी दिए । उनका अनुसार काभे्र जिल्लामा मात्रै ३७ वटा स्कुल भवन बनेका छन् । ५ वटा भवन निर्माण सम्पन्न हुने क्रममा रहेको लामाले बताए ।
तामाङ समुदायको बाहुल्यता रहेको डाडागाउँको विद्यालयमा दुई सयभन्दा धेरै विद्यार्थी अध्ययन गरिरहेको विद्यालय व्यवस्थापन समितिका अध्यक्ष कप्तान तामाङले बताए । भवन अभावमा चौरमा बसेर पढ्नुपर्ने अवस्थाको अन्त्य भएको कक्षा ७ मा अध्ययनरत विद्यार्थी सुनिता लामाले सुनाइन् । ‘ यसअघि पानी परे पनि चुहिने अवस्था रहेकोमा अबको राम्रो भवनमा पढ्न पाइने भयो ।’
एक सय तामाङको बस्तीको बिचमा बनेको सो भवन बनेपछि तामाङ समुदायका विद्यार्थीले अब विद्यालयसम्म नियमित जाने अभ्यास गर्ने विद्यालय हस्तान्तरण समारोहका प्रमुख अतिथी सभासद् तिर्थ लामाले बताए । सस्र्युखर्क गाविसका निर्वतमान अध्यक्ष संग्राम लामाले लामो समयदेखिको गाँउलेको सपना पुरा भएको भवन उद्घाटनपछि प्रतिक्रिया दिए ।
प्रतिक्रिया