पाल्पा, २३ भदौ । एसएलसीको पुरक परीक्षामा अनुत्तीर्ण भएपछि पाल्पामा पनि एक छात्राले आत्महत्या गरेकी छिन् ।
पाल्पा जिल्लाको बराङ्दी गाविस–९ ढापखोलाकी १९ वर्षीया तेलना बस्यालले गणित विषयमा अनुत्तीर्ण भएपछि आत्महत्या गरेको प्रहरीले जानकारी दिएको छ ।
एसएलसीको नतिजा सार्वजनिक भए पछि बारीमा घाँस काट्न गएकी बस्यालले रुखमा पासो लगाइ झुन्डिएर आत्महत्या गरेको प्रहरीको भनाइ छ ।
बस्यालले गत वर्ष पनि एसएलसी परीक्षामा सहभागी हुन नपाएको स्थानीयको भनाइ छ ।
यसअघि एसएलसीको पूरक परीक्षामा फेल भएपछि इलाममा पनि एक छात्राले आत्महत्या गरेकी थिइन् ।
सामाजिक र गणित विषयको परीक्षा दिएकी इलाम नगरपालिका–९ की १९ वर्षीया लक्ष्मी कटुवालले नतिजा आउने बित्तिकै आइतबार राति घरको निदालमा सलको पासो लगाएर आत्महत्या गरेकी जिल्ला प्रहरी कार्यालयले जनाएको छ ।
“एसएलसीमा पास हुन्छु भन्दै रमाइरहेकी थिइन्, तर नतिजा आउने बित्तिकै छोरीले झुन्डिएर आत्महत्या गरिन्,” अभिभावकको भनाइ उद्धृत गर्दै प्रहरी निरीक्षक यामबहादुर पौडेलले भन्नुभयो ।
प्रतिक्रिया