काठमाडौं, २९ असार । मतगणनास्थलमा सीसीटीभी राख्नुपर्ने अडानपछि नेकपा एमालेको नयाँ नेतृत्व छनोटका लागि भएको निर्वाचनको मतगणना कार्यमा ढिलाई भएको छ ।
मतगणना सम्वन्धी आचारसंहिता, विधि र प्राविधिक कुराहरुमा वरिष्ठ नेता माधवकुमार नेपाल र संसदीय दलका नेता केपी शर्मा ओली समूहबीच सहमति नभएपछि शनिवार हुने मतगणना कार्य आइतवारसम्मलाई स्थगन भएको थियो ।
अध्यक्षका प्रत्याशी माधवकुमार नेपालले मतगणनास्थलमा सीसीटीभी राख्नुपर्ने भनेपछि अहिले मतगणना स्थल दशरथ रंगशालास्थित कभर्डहलमा सीसीटीभी जडान गरिएको छ ।
शनिवार स्थगन भएको मतगणना आइतावर विहानै ८ बजेबाट सुरु गर्ने भनिएपनि अझै सुरु हुन सकेको छैन ।
निर्वाचन आयोगले दिएको जानकारी अनुसार पदाधिकारीको गणना सकेपछि मात्र केन्द्रीय कमिटी र आयोगहरुको मतगणना थालिने छ ।
रंगशालाभित्र ६ ठाउँबाट पदाधिकारी एवं सदस्यहरुको एकसाथ मत गणना गरिने छ ।
प्रतिक्रिया