काठमाडौ, ५ असार । नेकपा एमालेका सचिव शंकर पोखरेलले पार्टीको जारी प्रतिनिधि छनोटमा संसदीय दलका नेता केपी शर्मा ओली पक्षको ‘चमत्कार’ भएको दाबी गर्नुभएको छ ।
रिपोर्टर्स क्लब नेपालमा विहीबार आयोजित साक्षात्कारमा सचिव पोखरेलले अधिकांश ठाउँमा ओली पक्ष हाबी भएको बताउनुभयो ।
सचिव पोखरेलले पार्टी अध्यक्ष झलनाथ खनाल र माधवकुमार नेपालसँग नवौ महाधिवेशनमा अध्यक्ष पदमा उम्मेदवारी दिने नैतिक र बैधानिक आधार नभएको दावी समेत गर्नुभयो ।
माधवकुमार नेपाल बरिष्ठ नेतासहित तीन पटक कार्यकारी भइसकेको र खनाल पनि पहिला महासचिव र अहिले अध्यक्ष भइसकेकोले विधान अनुसार उहाँहरुले उम्मेदवारी दिनै नसक्ने दाबी थियो, पोखरेलको ।
पोखरेलले भन्नुभयो – ‘माधवकुमार नेपाल र झलनाथ खनालले उम्मेदवारी दिने हो भने विधान संसोधन गर्नुपर्छ । उहाँहरुले रहर नै गर्नुभएको हो भने विधान संसोधन गरिदिउँला । तर, जित्ने त केपी ओली नै हो ।’
पार्टीको नीति र विचार केपी ओलीको भएकोले अब नेतृत्व पनि उहाँकै हुने भन्दै पोखरेलले महाधिवेशन प्रतिनिधि चयनमामा ओली पक्षमा चमत्कार भएको दाबी गर्नुभयो ।
ओलीको स्वास्थ्य अवस्थालाई लिएर भइरहेको बहसलाई लिएर उहाँले पार्टी विचारले हाँक्ने भएकोले ब्यक्तिको स्वास्थ्यले कुनै फरक नपार्ने दावी गर्नुभयो । ओली अहिले पनि सक्रियनै रहेको उहाँको कथन थियो ।
एमालेको वैचारिक नेता पोखरेल संसदीय दलका नेता ओलीका अति निकट मानिनुहुन्छ ।
तेह्रथुम, ताप्लेजुंग, रसुवा र सोलुखुम्बुमा बुधबार प्रतिनिधि चयन भएको छ । पर्साका केही क्षेत्रमा पनि बिहीबार प्रतिनिधि चयन भएको छ । कतिपय ठाउँमा सर्वसम्मत प्रतिनिधि चयन भएपनि नेताहरुले भने आ-आफ्नो पक्ष हाबी भएको दाबी गर्दै आएका छन् ।
प्रतिक्रिया