सोलुखुम्ब । मकालु हिमालबाट शव लिएर काठमाडौं जाँदै गर्दा मौसम खराबीका कारण सोमबार बिहान थामसेर्कु हिमाल र कुसुम खाङकरु हिमालको फेदमा आकस्मिक अवतरण गरिएको फिस्टेल एअरको हेलिकोप्टर मंगलबार पनि उड्न सकेन ।
मौसम खराब भएपछि हेलिकोप्टर हिमालको फेदमा केही समथर जग्गामा अवतरण गराइएको थियो । करिब ५ हजार मिटरको उचाइमा पर्ने सो स्थानमा चालकलाई लेक लाग्ने समस्या भएपछि हेलिकोप्टर र शव त्यही छाडी उनीहरु पाँच घण्टा हिँडेर चौंरीखर्कको मञ्जोमा आएका थिए ।
दिउँसो केहीबेर मौसममा सामान्य सुधार आएपछि चालक र हेलिकोप्टरको उद्धारका लागि सिम्रिक एअरको हेलिकोप्टरले प्रयास गरेको भएपनि मौसममा सुधार नभएकाले त्यो सम्भव भएन ।
मकालु हिमाल आरोहणका क्रममा ज्यान गुमाएका ३९ वर्षीय फ्रान्सेली नागरिकको शव लिएर हेलिकोप्टर मकालु हिमालको आधारशिविरबाट काठमाडौंँ गइरहेको थियो ।
यसैबीच, सगरमाथा क्षेत्रको भ्रमणका लागि आएका स्लोभाकियाका नागरिक थोमस यही वैशाख ११ गतेदेखि बेपत्ता भएका छन् ।
भ्रमणको क्रममा वैशाख ८ गते खुम्जुङस्थित दिङबोचे पुगेका थोमसको खोजी भइरहेको जिल्ला प्रहरी कार्यालय सोलुखुम्बुका प्रहरी नायव उपरीक्षक बद्रीविक्रम थापाले जानकारी दिनुभयो ।
स्थानीय होटलबाट वैशाख ११ गते बिहान घुम्न निस्किएका थोमस बेलुकी होटलमा नफर्किएपछि स्थानीयवासीले प्रहरीलाई खबर गरेका थिए ।
प्रतिक्रिया