काठमाडौं, १० कात्तिक । भारतका मोस्ट वान्टेड ‘अण्डरवल्र्ड डन’ छोटा राजन इण्डोनेसियामा पक्राउ परेका छन् ।
भारतीय गृह मन्त्रालयले सोमबार राजनलाई इण्डोनेसिया प्रहरीले पक्राउ गरेको खबरको पुष्टि गरेको छ । प्रहरीका अनुसार छोटा राजन आइतबार अष्ट्रेलियाको सिड्नीबाट इण्डोनेसियाको बाली आएका थिए । उनी त्यहाँबाट बालीको एक रिसोर्टमा जाने तयारीमा थिए ।
बाली सहरका प्रहरी प्रवक्ता हेरी वियान्तोले अष्ट्रेलियन प्रहरीको सूचनामा छोटा राजनलाई एयरपोर्टबाटै पक्राउ गरिएको जानकारी दिनुभयो । अष्ट्रेलियन प्रहरीले राजन इण्डोनेसिया आउन लागेको सूचना दिएको थियो । छोटा राजनमाथि भारतमा १५ देखि २० जनाको हत्या गरेको आरोप छ । उनीविरुद्ध अन्तर्राष्ट्रिय प्रहरी सञ्जाल (इन्टरपोल)ले रेड कर्नरमा नोटिस जारी गरेको थियो ।
प्रहरी अनुसन्धानमा छोटा राजनको असली नाम राजेन्द्र सदाशिव निखलजे भएको समेत खुलेको छ । अहिले उनको उमेर ५५ वर्ष रहेको छ । उनी पछिल्लो केही वर्षदेखि फरार थिए । एक समय छोटा राजन र अण्डरवल्र्ड डन दाऊद इब्राहिम नजिकका साथी थिए । तर, कारोबारको झगडाले दुबै अलग भएका थिए ।
प्रतिक्रिया