च्याम्पियन्स लिगमा बार्सिलोनाको पहिलो जित, स्वरेजको उत्कृष्ठ गोल

काठमाडौं, १३ असोज । स्ट्राइकर लुइस स्वरेजले खेलको अन्तिम समयमा प्रहार गरेको गोलको मद्दतमा बार्सिलोनाले च्याम्पियन्स लिग फुटबलमा पहिलो जित हात पारेको छ ।

मंगलबार राति घरेलु मैदान नाउ क्याम्पमा भएको खेलमा बार्सिलोनाले बार्यन लिभरकुसनलाई २-१ गोल अन्तरले पराजित गरेको हो । बार्सिलोना च्याम्पियन्स लिगको पहिलो खेलमा रोमासँग बराबरीमा रोकिएको थियो ।

खेलमा बार्यन लिभरकुसनले २२ औं मिनेटमा अग्रता लिएको थियो । तर, ८० औं मिनेटमा बार्सिलोनाका सार्गी रोबर्टोेले बराबरी गोल फर्काए । त्यसको दुई मिनेटभित्रै लुइस स्वरेजले गोल गर्दै बार्सिलोनालाई जित दिलाए ।

यो खेलमा लिओनल मेस्सी सहभागी थिएनन् । उनी सात/आठ खेलमा मैदान बाहिर रहने जनाइएको छ ।