खलंगा (बैतडी), ८ असार । बैतडी–दार्चुला राजमार्गको गोकुलेश्वर सडकखण्ड शनिबार बेलुकादेखि अवरुद्ध भएको छ ।
उक्त सडकखण्डको गोकुलेश्वरस्थित बाँगाबगडमा ५० मिटरजति सडक पुरिएर यातायात अवरुद्ध भएको हो । पहिरोले दुईवटा गाडी पुरिएका छन् ।
दार्चुलाबाट बैतडीका लागि हिँडेको जिप र तराईतर्फ जाँदै गरेको मिनीटाटा पहिरोमा पुरिएका हुन् । ती सवारी साधन सडकमा फसेको अवस्थामा पुरिएकाले मानवीय क्षति भने नभएको प्रहरीले बताएको छ ।
पुरिएका सवारी साधनको नम्बर खुल्न नसकेको घटनास्थलमा उद्धारका लागि खटिएका प्रहरी जवान गोपाल भट्टले बताउनुभयो ।
शनिबार दिउँसोदेखि नै सडकमाथिबाट पहिरो जान थालेपछि सडक अवरुद्ध बनेको हो । अवरुद्ध सडक खुलाउनका लागि सडक डिभिजन नम्बर ३ पाटनले सहयोग नगरेको प्रहरीले बताएको छ ।
प्रशासन र प्रहरीको सहयोगमा झुलाघाट सडकमा कार्यरत जेसिबी चालक बोलाएर गोकुलेश्वरतर्फ पठाइएकोले छिट्टै सडक खुलाउन काम थालिने बैतडीका प्रहरी निरीक्षक भरत शाहले बताउनुभयो ।
सडक अवरुद्ध हुँदा दार्चुलाबाट तराईका लागि हिँडेका र बैतडीलगायत तराईबाट दार्चुला हिँडेका सयौँ यात्रु बाटोमै अलपत्र परेका छन् ।
प्रतिक्रिया