पहिले जनताले सरकार चुन्ने गर्थे, अहिले कसले मतदान गर्न पाउने भन्ने निर्णय सरकारले गर्छ : अभिजीत दीपके

मुम्बई । भारतको युवाहरूको समूह ‘कक्रोच जनता पार्टी’ (सिजेपी)का संस्थापक अभिजीत दीपकेले देशका विभिन्न संस्थाहरूको जवाफदेहिताबारे गम्भीर प्रश्न उठाएका छन् ।

महाराष्ट्रको एक कार्यक्रममा बोल्दै उनले देशभर संस्थागत जवाफदेहिता क्रमशः कमजोर हुँदै गएको र यसले गर्दा लोकतान्त्रिक संस्थाहरूमाथिको जनविश्वास घट्दै गएको बताए ।

उनका अनुसार विगतमा जनताले सरकार चयन गर्थे भने अहिले परिस्थिति यस्तो बन्दै गएको छ कि कसले मतदान गर्न पाउने वा नपाउने भन्ने निर्णय सरकारले नै गर्छ । उनले भने कि निर्वाचन आयोगलाई जवाफदेही नबनाएसम्म निर्वाचन प्रक्रियाबारे प्रश्नहरू उठिरहनेछ ।

उनले निर्वाचन आयोगको जवाफदेहिता सुनिश्चित गर्नु अहिलेको आवश्यकता भएको बताए । उनका अनुसार, यदि आयोगको जवाफदेहिता सुनिश्चित गरिएन भने निर्वाचन प्रक्रियामा अनियमितता र धाँधलीसम्बन्धी आरोपहरू कायमै रहनेछन् । उनले निर्वाचन केवल औपचारिकतामा सीमित हुने जोखिम रहेको चेतावनी दिँदै निर्वाचन प्रक्रियाप्रति जनविश्वास कायम राख्नु अपरिहार्य भएको उल्लेख गरे ।

उनले न्यायपालिकाको कार्यशैलीमाथि पनि प्रश्न उठाए । उनले सर्वसाधारणसँग सम्बन्धित मुद्दाहरूको सुनुवाइमा लामो समय लाग्ने तर हाई प्रोफाइल मुद्दाहरूको सुनुवाइ भने छिटो हुने गरेको टिप्पणी गरे ।

उनका अनुसार सर्वसाधारण नागरिकले प्रायः अदालतमा पटकपटक धाउनुपर्ने हुन्छ । यसको विपरीत, हाई प्रोफाइल मुद्दाहरूमा भने प्रायः छिटो सुनुवाइ हुने र आदेशहरू पनि तत्काल जारी हुने गर्दछन् । उनले यस अवस्थाले न्याय प्रणालीप्रति सर्वसाधारणमा प्रश्नहरू उब्जाइरहेको बताए ।

दीपकले लोकतन्त्रलाई सुदृढ राख्न राजनीतिक प्रणाली, निर्वाचन आयोग र न्यायपालिकाजस्ता संस्थाहरूको जवाफदेहिता सुनिश्चित गर्नु अपरिहार्य रहेको बताए । त्यसपछि मात्र यी संस्थाहरूमाथि जनविश्वास बलियो रहने उनको भनाई छ ।