यामाहा नेपालको पहिलो हाइब्रिड मोटरसाइकल एक हप्तामै सोल्ड आउट

काठमाडौं । यामाहा नेपालले हालै सार्वजनिक गरेको एफजेटएस एफआई हाइब्रिड मोटरसाइकलले ग्राहकहरूबाट अत्यन्त सकारात्मक प्रतिक्रिया पाएको छ, जसका कारण आधिकारिक लन्च भएको एक हप्तामै यो मोडलका सबै युनिट बिक्री भएको छ । हालै सार्वजनिक गरिएको एफजेटएस एफआई हाइब्रिडले नेपालमा हाइटेक इनोभेसनसहितका नयाँ पुस्ताको मोटरसाइकलिङ भित्र्याएको छ ।

कम्पनीका अनुसार देशकै पहिलो हाइब्रिड मोटरसाइकलका रूपमा लन्च भएको यो मोडललाई प्रदर्शन र दक्षता सँगसँगै अघि बढ्ने भविष्यतर्फको महत्वपूर्ण कदमको रूपमा हेरिएको छ ।

एफजेट लिगेसीमा आधारित यस मोडललाई पावर, सुधारिएको इन्धन दक्षता र कम उत्सर्जनबीच सन्तुलन कायम गर्ने गरी डिजाइन गरिएको छ । यसले बढ्दो इन्धन मूल्य र शहरी ट्राफिक जस्ता मुख्य चुनौतीहरूलाई सम्बोधन गर्दछ । उन्नत प्रविधिबाट सुसज्जित नयाँ एफजेटएस एफआई हाइब्रिडले चर्चित एफजेट लिगेसीलाई निरन्तरता दिँदै थप शक्तिशाली प्रदर्शन, स्मार्ट कार्यक्षमता र उत्कृष्ट इन्धन दक्षता प्रदान गर्दछ, जसले यसलाई नेपालकै सबैभन्दा बढी माइलेज दिने मोटरसाइकल बनाएको छ ।

प्रविधिप्रति बढ्दो आकर्षण र राइडरहरूको आजको माइलेज आवश्यकतालाई ध्यानमा राख्दा यस मोटरसाइकलले प्राप्त गरेको प्रतिक्रिया अत्यन्तै सकारात्मक देखिएको छ, जसले छोटो समयमै यसले बलियो बजार स्वीकार्यता प्राप्त गरेको प्रमाणित गरेको कम्पनीको दाबी छ ।

यो उल्लेखनीय सफलतापछि यामाहा नेपालले एफजेटएस एफआई हाइब्रिडको अर्को ब्याचका लागि प्रि–बुकिङ खुला गरिएको आधिकारिक रूपमा घोषणा गरेको छ । ग्राहकहरूले प्रि–बुकिङ प्रक्रियासम्बन्धी जानकारी यामाहाका आधिकारिक सामाजिक सञ्जाल प्लेटफर्महरू तथा देशभरका अधिकृत डिलरमार्फत प्राप्त गर्न सक्नेछन् ।

कम्पनीले उच्च मागलाई ध्यानमा राख्दै नयाँ स्टक चाँडै उपलब्ध गराइने र इच्छुक ग्राहकहरूलाई समयमै डेलिभरी सुनिश्चित गरिने जनाएको छ । यस उपलब्धिबारे बोल्दै यामाहा नेपालका कार्यकारी निर्देशक तथा प्रमुख कार्यकारी अधिकृत दीपककुमार अग्रवालले भने, “आजको राइडिङ वातावरणमा प्रविधि र माइलेजको महत्व बढिरहेको सन्दर्भमा प्राप्त प्रतिक्रियाहरू अत्यन्तै उत्साहजनक छन् । यसले यामाहाको दृष्टिकोण र उत्पादनप्रति ग्राहकहरूले देखाएको विश्वासलाई प्रतिबिम्बित गर्दछ । हामी ग्राहकहरूको विश्वास र साथप्रति हार्दिक कृतज्ञता व्यक्त गर्दछौँ ।”

उनले कम्पनी नेपाली राइडरहरूको बदलिँदो आवश्यकता अनुसार नवीन र व्यवहारिक यातायात समाधानहरू ल्याउन प्रतिबद्ध रहने पनि बताए ।

कम्पनीका अनुसार यो सफल लन्चसँगै यामाहाले नयाँ उत्पादन मात्र नभई बजारमा नयाँ मापदण्ड पनि स्थापना गरेको छ । एफजेटएस एफआई हाइब्रिडको प्रारम्भिक माग उच्च भएसँगै नेपाल अझ स्मार्ट र दक्ष मोटरसाइकलिङतर्फ स्पष्ट रूपान्तरण भइरहेको संकेत गरेको छ, जसले ब्रान्ड र ग्राहक दुवैका लागि सम्भावनासहित नयाँ अध्यायको सुरुवात गरेको छ ।