विश्वकप जितको उत्सवमा भारतीय झण्डाको अपमान गरेको भन्दै हार्दिक पाण्ड्याविरुद्ध उजुरी

काठमाडौं । सन् २०२६ को टी–२० विश्वकप जितको उत्सवमा भारतीय झण्डाको अपमान गरेको आरोपमा क्रिकेटर हार्दिक पाण्ड्याविरुद्ध उजुरी दर्ता भएको छ । हार्दिकमाथि विश्वकप जितेपछि उत्सव मनाउने क्रममा आफ्नो शरीर वरिपरि भारतीय झण्डा ओढेर अनुचित व्यवहार गरेको आरोप लगाइएको छ ।

पुणेका वकिल वाजिद खानले हार्दिकविरुद्ध शिवाजीनगर प्रहरी चौकीमा उजुरी दर्ता गरेका हुन् ।

वकिल खानको उजुरीमा हार्दिकले आफ्नी प्रेमिकासँग झण्डामा बेरेर विश्वकप जितको उत्सव मनाएको उल्लेख गरिएको छ । यस समयमा हार्दिकले अनुपयुक्त व्यवहार गरिरहेका थिए ।

खानका अनुसार हार्दिकको व्यवहार राष्ट्रिय झण्डाको गरिमाविरुद्ध छ, त्यसैले उनीविरुद्ध कानुनी कारबाही गरिनुपर्छ । राष्ट्रिय झण्डाको सम्मान गर्नु प्रत्येक भारतीय नागरिकको कर्तव्य हो । झण्डा बेर्नु र अनुपयुक्त व्यवहार गर्नु अपमान हो ।

प्रहरीले पनि उजुरी प्राप्त भएको पुष्टि गरेको छ । प्रहरीका अनुसार हार्दिकमाथि झण्डाको अपमान गरेको आरोप लगाउँदै लिखित उजुरी दर्ता गरिएको छ । प्रहरीले यस उजुरी उच्च अधिकारीहरूलाई पठाएको छ ।