विघटित केन्द्रीय समितिको बैठक बोलाउने माओवादीको तयारी

काठमाडौं, १५ कात्तिक । नेकपा माओवादी केन्द्रले विघटित केन्द्रीय समितिको बैठक बोलाउने तयारी गरेको छ । नेकपा एकीकृत समाजवादी सहितका दलहरूसँग एकताको निर्णय अनुमोदन गर्न केन्द्रीय समितिको बैठक बोलाउन लागिएको हो ।

‘यही १७ गते केन्द्रीय समितिको बैठक राख्ने तयारी छ,’ एक नेता भने, ‘त्यसको एक मात्रै एजेण्डा एकीकृत समाजवादी सहितका दलसँगको एकताको निर्णय अनुमोदन गर्नु रहनेछ ।’

माओवादी केन्द्रको केन्द्रीय समितिको बैठक यसअघि असोजमा बसेको थियो । गत असोज १० गते सम्पन्न केन्द्रीय समितिको बैठकले आगामी मंसिर अन्तिम साता विशेष महाधिवेशन गर्ने निर्णय गरेको थियो । यो निर्णयसँगै केन्द्रीय समिति भंग भएको थियो ।

तर, नेताहरूका अनुसार महाधिवेशनमा पुग्नु अगावै अन्य पार्टीसँग एकता हुने भएकाले अनुमोदनका लागि केन्द्रीय समितिको बैठक राख्न लागिएको हो ।