श्रीनगर एग्रीटेक इन्डस्ट्रिजको आईपीओमा आवेदन दिने आज अन्तिम दिन

काठमाडौं, २९ असोज । श्रीनगर एग्रीटेक इन्डस्ट्रिज लिमिटेडको आईपीओमा आवेदन दिने आज अन्तिम दिन हो । कम्पनीले असोज २६ गतेदेखि आम सर्वसाधारणका लागि १०० रुपैयाँ अंकित दरका २५ लाख १० हजार ४९३ कित्ता सेयर जारी गरेको हो, जसको कुल मूल्य करिब २५ करोड १० लाख रुपैयाँ बराबर हुन्छ ।

यसमा सामूहिक लगानी कोषका लागि १ लाख ५४ हजार ९६९ कित्ता र कर्मचारीका लागि १ लाख २३ हजार ९७५ कित्ता छुट्याइएको छ ।

लगानीकर्ताले न्यूनतम १० र अधिकतम १० हजार कित्तासम्मका लागि आवेदन दिन सक्छन् । आवेदन आस्बा सदस्य बैंक, वित्तीय संस्थाहरू तथा मेरो सेयरमार्फत दिन सकिन्छ ।

नबिल इन्भेष्टमेन्ट बैंकिङ लिमिटेड आईपीओको निष्कासन तथा बिक्री प्रबन्धक हो । यसअघि कम्पनीले उद्योग प्रभावित क्षेत्रका बासिन्दा र वैदेशिक रोजगारीमा रहेका नेपालीका लागि आईपीओ जारी गरिसकेको छ ।