महासचिवसहित कर्मचारीले सफा गरे संसद सचिवालयको आगजनीको फोहोर

काठमाडौं, १२ असोज । जेनजी आन्दोलनमा आगजनी गरिएका सवारी साधन जलेर थुप्रिएको फोहोर संघीय संसद सचिवालयका कर्मचारीले सफाइ गरेका छन् ।

दशैं बिदाको अघिल्लो दिन आइतबार संघीय संसदका महासचिव पद्मप्रसाद पाण्डेयको नेतृत्वमा कर्मचारीहरूले संघीय संसद सचिवालयको भवन नम्बर १ परिसरमा थुप्रिएको फोहोर सफा गरेको आन्तरिक सेवा तथा योजना शाखाका उपसचिव अधिराज राईले जानकारी दिए ।

भदौ २४ गतेको जेनजी आन्दोलनमा भवन नम्बर २ परिसरमा रहेका सवारी साधनमा आगजनी गरिएको थियो । आगजनीबाट १८ वटा गाडी र ३६ वटा मोटरसाइकल नष्ट भएका छन् । आगजनीबाट जलेका सवारी साधनलाई पनि सचिवालय परिसरबाट अन्यत्रै व्यवस्थापन गरिएको छ ।

आगजनीबाट सिंहदरबारमा रहेका सचिवालयका दुवै भवन र काठघरहरू जोगिएका छन् ।