काठमाडौं, २ चैत । जारी पीएम कपअन्तर्गत नेपाल पुलिस क्लबले लगातार चौथो जित हासिल गरेको छ ।
शनिबार देउखुरी क्रिकेट स्टेडियममा सम्पन्न खेलमा पुलिसले मधेश प्रदेशलाई १९३ रनले पराजित गरेको हो । पुलिसले दिएको २८९ रनको लक्ष्य पछ्याएको मधेश प्रदेशले २६.१ ओभरमा अल आउट हुँदै ९५ रन बनाएको थियो ।
मधेशका लागि दिपेश दासले सर्वाधिक ३१ रन बनाए भने रुपेश सिंहले १६ रन बनाएका थिए ।
त्यस्तै, पुलिस क्लबका लागि ललित राजबंशीले ५ विकेट लिएका थिए भने कुशल भुर्तेलले २ विकेट लिएका थिए ।
यसअघि टस जितेर पहिला ब्याटिङ गर्दै पुलिस क्लबले ४९.५ ओभरमा अल आउट हुँदै २८८ रन बनाएको थियो । पुलिसका लागि कप्तान दिपेन्द्र सिंह ऐरीले सर्वाधिक ३६ बलमा ६३ रन बनाएका थिए भने आरिफ सेखले ५५ रन बनाए ।
त्यस्तै, अर्जुन साउदले ४७ र दिलिप नाथले ४५ रन बनाएका थिए ।
त्यस्तै, मधेश प्रदेशका बलर रुपेश सिंहले ४ विकेट लिए भने विशाल पटेलले ३ विकेट लिएका थिए ।
यो जितपछि पुलिस क्लबको ४ खेलमा ८ अंक भएको छ र पुलिस अपराजित रहेको छ ।
त्यस्तै, मधेश प्रदेशको भने यो दोस्रो हार हो । मधेशको ३ खेलमा एक जित र २ हारसहित २ अंक रहेको छ ।
प्रतिक्रिया