चीनकी ‘ब्युटिफुल गभर्नर’लाई १३ वर्षको जेल सजाय

काठमाडौं, ६ असोज । चीनमा ‘ब्युटिफुल गभर्नर’ भनेर चिनिने गुइझाउ प्रान्तकी गभर्नर झोङ याङलाई १३ वर्षको जेल सजाय सुनाइएको छ । उहाँलाई १ करोड १६ लाख रुपैयाँ जरिवाना पनि लगाइएको छ ।  ५२ वर्षीय झोङ याङ ७१ करोड रुपैयाँ घुस लिएको र उहाँसँग काम गर्ने ५८ जनासँग शारीरिक सम्बन्ध राखेको अभियोगमा दोषी ठहर हुनुभएको छ ।

साउथ चाइना मर्निङ पोस्टकाअनुसार झोङ चिनियाँ कम्युनिष्ट पार्टीबाट गुइझोउका उपसचिव र गभर्नर भइसक्नुभएको छ । उहाँ २२ वर्षको उमेरमा पार्टीमा प्रवेश गर्नुभएको थियो । जनवरी २०२३ मा चीनको गुइझोउ रेडियोले आफ्नो रिपोर्टमा झोङसँग सम्बन्धित विवादहरू उल्लेख गरेको थियो ।

सरकारी लगानीको आडमा आफ्नो मनपर्ने कम्पनीलाई ठूला ठेक्का दिलाउन आफ्नो हैसियत प्रयोग गरेको आरोप उहाँमाथि लागेको थियो । एउटा मामलामा, झोङले एक व्यापारीलाई १.७ लाख वर्ग मिटर जग्गामा हाईटेक इन्डस्ट्रियल इस्टेट बनाउने ठेक्का दिनुभएको थियो । यस व्यापारीको झोङसँग घनिष्ठ सम्बन्ध थियो । यो सम्झौताबाट झोङलाई पनि धेरै फाइदा भयो । रिपोर्टकाअनुसार झोङले आफ्नो व्यक्तिगत सम्बन्ध भएका कम्पनीहरूलाई मद्दत गर्नुहुन्थ्यो । अप्रिल २०२३ मा, गुइझाउ प्रान्तको सुपरिवेक्षण समितिले झोङविरुद्ध अनुसन्धानको घोषणा गर्‍यो । यस अवधिमा झोङमाथि ५८ पुरुषसँग शारीरिक सम्बन्ध राखेको आरोप पनि लागेको थियो ।

यी मध्ये धेरै जसो व्यक्तिहरू थिए जसको व्यवसायबाट झोङले फाइदा उठाउनुभएको थियो । कतिपयमा झोङ याङसँग काम गर्ने व्यक्तिहरू पनि थिए । चिनियाँ सञ्चारमाध्यमकाअनुसार झोङले यी व्यक्तिहरूलाई व्यापार यात्रा वा ओभरटाइमको बहानामा भेट्ने गर्नुहुन्थ्यो । झोङलाई गत वर्ष अप्रिलमा पक्राउ गरिएको थियो ।

यसपछि सेप्टेम्बर २०२३ मा, चीनको सिन्ह्वा समाचार एजेन्सीले आफ्नो रिपोर्टमा झोङलाई कम्युनिष्ट पार्टी र नेसनल पिपुल्स कंग्रेसबाट निष्कासन गरिएको बताएको थियो । उहाँमाथि बनेको डकुमेन्ट्रीमा झोङ याङले आफूले गरेको कामप्रति पश्चाताप भएको बताउनुभएको छ । उहाँ अब आफ्ना सहकर्मी, परिवार र राजनीतिक नेताहरूसँग आँखा सम्पर्क गर्न सक्नुहुँदैन । ‘मैले सोचेँ कि यस तरिकाले मलाई राजनीतिक मुद्दाहरूमा मद्दत गर्न केही भरपर्दो व्यवसायीहरू पाउँछन्,’ झोङले भन्नुभयो, ‘मेरा आमाबाबुले मलाई काममा इमानदार हुन सल्लाह दिए, तर मैले उनीहरूको कुरा सुनिन ।’