शिक्षकहरुको आन्दोलन आज पनि जारी

काठमाडौं, ५ असोज । शिक्षक महासंघले विद्यालय शिक्षा विधेयकविरुद्धको आन्दोलनलाई आज पनि निरन्तरता दिने भएको छ ।

बिहीबार सरकार र महासंघबीचको वार्ता निष्कर्षविहीन भएपछि महासंघले आज तेस्रो दिन आन्दोलनलाई निरन्तरता दिने भएका हुन् ।

महासंघको नेतृत्वमा शिक्षकहरू सडक आन्दोलनमा होमिएपछि देशभरको सामुदायिक विद्यालयको पठनपाठन ठप्प भएको छ ।

शिक्षकहरूले काठमाडौं केन्द्रित आन्दोलन गरेर आफ्नो माग पूरा गर्न दबाब दिइरहेका हुन् । आन्दोलनका कारण काठमाडौं उपत्यकाको सवारी आवागमन अस्तव्यस्त भएको छ ।

सरकारले ल्याएको शिक्षा विधेयकले सरकारी शिक्षक, राहात शिक्षकलगायतलाई अन्याय गरेको भन्दै तत्काल विधेयक सच्चाउनु पर्ने माग गर्दै शिक्षकहरु आन्दोलनमा उत्रिएका हुन् । उनीहरुले आफ्नो माग पूरा नभएसम्म काठमाडौं  नछोड्ने अडान लिएका छन् ।