पार्टीभित्रको बिषय सडकमा लाने काम पार्टीको जिम्मेवार मान्छेले गर्दैन: माधव नेपाल

काठमाडौं, ४ भदौ । नेकपा एकीकृत समाजवादीका अध्यक्ष माधव कुमार नेपालले अन्तरपार्टी निर्देशन (अपानी)मा देखिएको समस्या पार्टी भित्रैबाट हल गरिने बताएका छन् ।

बिहीबार पार्टी कार्यालय आलोकनगरमा आयोजित सपथ ग्रहण कार्यक्रमपछि सञ्चारकर्मीसंग कुरा गर्दै अध्यक्ष नेपालले अपानीमा मतभेद नभइ केही प्रश्नहरु आएको भन्दै पार्टी भित्रैबाट हल गरिने बताएका हुन् ।

अपानीमा पार्टीका सम्मानित नेता झलनाथ खनालले गरेको टिप्पणीका बारे सोधिएको प्रश्नमा अध्यक्ष नेपालले पार्टीभित्रको बिषय सडकमा लाने काम पार्टीको जिम्मेवार मान्छे र अनुशासन बुझेको मान्छेले नगर्ने जिकिर गरे । खनालले अध्यक्ष नेपालले एकलौटी गरेको भन्दै नेताहरूको कार्यविभाजन सच्याउन माग गर्दै आएका छन् ।

त्यस्तै नेपालले सरकारले राम्रो काम गरिरहेको भन्दै अझै राम्रो काम गरेर जनताको विश्वास जित्नुपर्ने धारणा राखे । अध्यक्ष नेपालले अहिले शिक्षकहरुको आन्दोलनप्रति सरकार गम्भीर हुनुपर्ने र वार्ता तथा छलफलबाट निकास निकाल्नुपर्ने उल्लेख गरे ।

अध्यक्ष नेपालले केन्द्रीय कमिटीको छैटौ बैठकले केन्द्रीय कमिटीका सदस्यहरु मनोनित गरिएकाहरु मध्ये १३ जनालाई विधान अनुसार सपथ गराइएको जानकारी दिनुभयो ।

सपथ ग्रहणका क्रममा उनले युवाहरुको जोश र पुरानाका अनुभवलाई समेटिएर पार्टीलाई मजबुद ढंगले अघि बढाइने जिकिर गरे ।