सिंगापुरलाई ९७ रनले पराजित गर्दै नेपाल फाइनलमा

काठमाडौं, १८ असार । नेपालले एसीसी यू१६ इस्ट जोन कपको सेमिफाइनल खेलमा सिंगापुरलाई ९७ रनले हराउँदै फाइनलमा प्रवेश गरेको छ ।

मलेसियाको बायोमास ओभल क्रिकेट मैदानमा आज भएको प्रतिस्पर्धामा जितका लागि १८५ रनको विजयी लक्ष्य पछ्याएको सिंगापुर ३१.३ ओभरमा ८७ रनमा अल आउट भयो ।

त्यसअघि टस जितेर पहिला ब्याटिङ रोजेको नेपालले निर्धारित ३५ ओभरमा ९ विकेट गुमाउँदै १८५ रनको योगफल बनाएको थियो । नेपालको जितमा ओपनर निरजकुमार यादव ४२ र सुर्यांशु कोइरालाले ४३ रनको योगदान दिए ।

यसैबीच, मलेसियाले अर्को सेमिफाइनल खेलमा हङकङलाई हराउँदै फाइनलमा स्थान बनाएको छ । समूह चरणमा नेपालले मलेसियालाई ८४ रनले हराएको थियो ।