अमेरिकामा बस्ने नेपालीले मनाए होली (तस्वीरहरु)

अमेरिका, २३ फागुन । संयुक्त राज्य अमेरिकामा बस्ने नेपाली समुदायले रंगहरूको पर्व होली धुमधामका साथ मनाएका छन् ।

नेपालीहरूको अत्यधिक बसोबास रहेको टेक्सास राज्यको अस्टिन सहरमा सोमबार आयोजित बृहत् होली कार्यक्रममा ठूलो संख्यामा नेपालीहरूको उपस्थिति रहेको थियो ।

नेपाली सोसाइटी अस्टिनले आयोजना गरेको कार्यक्रममा एक हजारभन्दा बढीको सहभागिता रहेको सोसाइटीका सदस्य नेत्रबन्धु पोखरेलले उल्लेख गरेका छन् ।

प्रवासको व्यस्त जीवनशैलीका बाबजूद पनि आफ्नो देशको कला संस्कृति, चाडपर्व र रितीरिवाजहरूलाई सम्बर्द्धन गर्ने कार्यमा नेपाली समुदाय सधैँ कटिबद्ध रहिरहने पोखरेलको भनाइ छ ।

यता ठूलो संख्यामा नेपालीहरूको बसोबास रहेको न्यूयोर्क, क्यालिफोर्निया, मेरिल्याण्ड, सिकागो, वासिगंटन डिसी लगायतका ठाउँहरूमा रहेका नेपालीहरूले एक आपसमा रंग साटासाट गर्दै हर्षोल्लासका साथ होली पर्व मनाएको खबर प्राप्त भएका छन् ।