कपनमा भएको आगलागीबाट तीन जनाको मृत्यु, घाइतेहरूलाई अस्पताल पुर्‍याइयो

काठमाडौं, ५ असोज । काठमाडौंको कपनमा भएको भीषण आगलागीमा परी तीन जनाको मृत्यु भएको छ ।

बुधबार बेलुकी ७ बजे कपनको एक घरमा आगलागी हुँदा तीन जनाको मृत्यु भएको महानगरीय प्रहरी वृत्त बौद्धले जानकारी दिएको छ । तर, मृतकको पहिचान भने खुलिसकेको छैन ।

आगलागीमा परी घाइते भएका अन्य व्यक्तिहरूलाई टिचिङ अस्पतालमा पुर्याइएको छ ।

ट्रेकिङ्ग अफिस र ट्रेकिङ्गमा प्रयोग हुने सामान राखिएको घरमा आगलागी भएको प्रहरीले जनाएको छ ।

आगलागी नियन्त्रणमा लिन काठमाडौं, ललितपुर र भक्तपुरको दमकल प्रयोग गरिरहेको प्रहरीले जनाएको छ ।