बारामा डाँका र प्रहरीबीच दोहोरो भिडन्त, वरिष्ठ सई घाइते

काठमाडौं, १९ भदौ । बारामा डाँका र प्रहरीबीच दोहोरो भिडन्त भएको छ ।

उद्योग लुट्न आएका डाँका समूह र प्रहरीबीच गोली हानाहान भएको हो ।

जीतपुरसिमरा उपमहानगरपालिका वडा नं २३ भलुहीस्थित एरोटेक प्रालिमा लुटपाट लुट्न आएका डाँका समूहसँग भिडन्त भएको हो ।

जिल्ला प्रहरी कार्यालय बाराका अनुसार डाँका समूहले एक राउण्ड फायर गरेका थिए भने प्रहरीले ३ राउण्ड हवाई फायर गरेको थियो ।

त्यस्तै, लुट्न आएकामध्ये दुई जनालाई पक्राउ गरिएको प्रहरीले जनाएको छ ।

समयमै प्रहरी पुगेकाले उद्योग लुटिनबाट रोकिएको छ ।

प्रहरीले घटनास्थलबाट घरेलु बन्दुक तथा थान कटुवा पेस्तोल एक/एक थान र तीन राउण्ड गोली बरामद गरेको छ । मध्यरातमा १२/१५ जनाको संख्यामा डाँका समूह लुटपाट गर्न उद्योग पसेको सूचना प्रहरी अलर्ट थियो ।

घटनामा डाका समूहले हानेको रडले लागेर एकजना वरिष्ठ सई घाइते भएका छन् । उनको उपचार भइरहेको जनाइएको छ ।