अर्थमन्त्री शर्माले लिए शपथ

काठमाडौं, १५ साउन । अर्थमन्त्री जनार्दन शर्माले पद तथा गोपनीयताको शपथ लिएका छन् । आइतबार साँझ राष्ट्रपति कार्यालयमा आयोजित समारोहमा राष्ट्रपति विद्यादेवी भण्डारीले अर्थमन्त्री शर्मालाई शपथ गराएकी हुन् ।

बजेट बनाउँदा अनधिकृत मान्छे छिराएको अभियोगपछि छानबिनका लागि अर्थमन्त्री पदबाट राजीनामा दिएका जनार्दन शर्मा फेरि नियुक्त भएका छन् ।

गत २२ असारमा संसदीय छानबिन समिति गठन भएको थियो । शर्माले त्यसै दिन राजीनामा दिएका थिए । तर संसदीय समितिले उनीमाथि लागेको आरोप पुष्टि गर्न सकेन भने प्रधानमन्त्री शेरबहादुर देउवाले उनलाई अर्थमन्त्रीमा पुनः नियुक्त गरेका हुन् ।