दोलखाको बैत्यश्वर गाउँपालिकाको दुई वडामा बुथ कब्जाको प्रयास हुँदा हवाई फायर, सुरु भएन मतदान

दोलखा, ३० वैशाख । दोलखाको बैत्यश्वर गाउँपालिका वडा नं १ र २ को मतदान केन्द्रमा मतदान सुरु हुन सकेको छैन ।

गएरातिदेखि नेपाली कांग्रेस, एमाले र माओवादी केन्द्रबीच त्रिपक्षीय झडप हुँदा अहिलेसम्म मतदान सुरु हुन सकेको छैन ।

उनीहरुबीच शुक्रबार विहानै पनि झडप भएको जिल्ला प्रहरी कार्यालय दोलखाका प्रमुख प्रहरी नायब उपरीक्षक (डीएसपी) गंगाप्रसाद न्यौपानेले जनाएका छन् ।

अहिले सर्वदलीय बैठक बसेर मतदानका लागि प्रयास भइरहेको जनाइएको छ ।

त्रिपक्षीय झडप नियन्त्रणमा लिन प्रहरीले गोलीसमेत चलाएको छ । प्रहरीका अनुसार शुक्रबार बिहान पनि मतदान सुरु हुन लागेकै बेला झडप भएको थियो ।

त्यस्तै, माओवादी, कांग्रेस लगायतले बुथ क्याप्चर गर्न खोजेपछि प्रहरीले २ राउण्ड हवाई फायर गरेको थियो ।

यहाँ प्रत्येक चुनावमा बुथ कब्जा हुँदै आएको छ ।

उता सधैं बुथ कब्जा हुने तामाकोसीका मतदान केन्द्रमा भने शान्तिपूर्वक मतदान भइरहेको प्रहरीले बताएको छ ।