सगुन डटकममा नेपालीको ५ करोड लगानी

वासिङ्टन डीसी, १२ वैशाख । अमेरिकाको वासिङ्टन डीसी तथा भारतको नयाँ दिल्लीबाट संचालित सगुन संस्थाले प्रवद्र्धन गरेको सामाजिक संजालकोे उत्पादन तथा इन्जिनियरिङ्ग(अभियान्त्रिकी)क्षेत्रको विकासका लागि पाँच लाख अमेरीकी डलर (करिव पाँच करोड रुपैया) को प्रारम्भिक लगानी सम्झौता सम्पन्न भएको छ ।

यस सँगै सगुनले उत्पादनमा समुदायको सहज पहुँच निर्माण गर्ने उद्देश्य राखेको छ । कम्पनीको भिजन वेभ ३ को पहिलो चरणमा गत फेब्रुअरीमा सगुनले परिक्षण स्वरुप ‘सोसियल स्मार्ट कार्ड ’ र ‘मी पेज’को सुरुवात गरेको थियो । सगुनले प्रबर्धन गरेको ‘सोसियल स्मार्ट कार्ड’ उपभोक्ताको लागि फाइदाजनक रहेको विज्ञप्तीमा उल्लेख छ ।

प्रत्येक हप्ता २० प्रतिशतका दरले बढीरहेका प्रयोगकर्ताको संख्या अझै बढ्ने क्रममा छ । हालसम्म १ लाख ५६ हजार प्रयोगकर्ता सगुनसँग जोडिएका छन् । १५ लाख बढी सम्भावित प्रयोगकर्ताहरु प्रतिक्षाको सूचीमा छन् । ‘मी पेज’को सुरुआतपछि ४८ हजार पेज निर्माण भइसकेको छ, भने ५ लाख बढी टेक्स्ट म्यासेज र फोटोहरु आदान–प्रदान भएका छन् ।

पेन्टागनका सिस्टम इन्जिनियर (पद्धति अभियन्ता)रहेर काम गरिसकेका सगुनका संस्थापक गोविन्द गिरीले सम्झौता पश्चात लगानीकर्ताहरु प्रति आभार व्यक्त गरेका छन् । गिरी भन्छन्- ‘तपाईहरुको विश्वास भविष्यको चुनौतीको सहज सामना गर्ने ऊर्जा, शक्ति र उपहार हो । विश्वास नै भविष्यफल हो ।’