-निर्मल भट्टराई
बच्चा बेलामा असार महिनामा म खेतमा कुलो फर्काउन जान्थें । असारमा त पटक-पटक कुलो फर्काइरहनु पर्थ्यो । साँधमा एकजना जब्बर दाई थिए । हामीलाई लटरपटर पारेर उनको खेत डम्म भर्थे ।
मेरा बा आमालाई काकाकाकी भन्ने हुनाले हामी उनलाई दाई भनेर सम्बोधन गर्थ्यौं । मन मिलेको बेला मलाई भाई भनेर विछट्ट माया पनि गर्थे ।
एक सालको कुरा हो । अल्पवृष्टिको साल थियो । कुलोमा सानो पानी थियो । कुलो आफ्नो खेततिर फर्काएर म ढुकेर बसेको थिएँ म । पानीको पालो मेरो थियो ।
मेरा सँधियार दाई स्याँ स्याँ र फ्याँ फ्याँ गर्दै मैले कुलो कुरेर बसेको ठाउँमा आईपुगे ।
“आराम हुनुहुन्छ दाई ?” मैले सोधें ।
ती दाईले कुलो जबर्जस्ती आफ्नो खेततिर फर्काए । खाउँलाजस्तो गरेर मलाई हेरे । दाईले अलिअलि खाजा(जाँड) दन्काईसकेका रहेछन् ।
“आज त पानीको पालो हाम्रो हो दाई ।” मैले सतर्क हुदै भनें ।
“तेरो दाई कसरी भएँ म ? तेरा बाउ आमाले पा’को हो मलाई ?” उनले रिसाएर भने ।
“दाईले मेरा बा आमालाई काकाकाकी भनेकोले मैले तपाईंलाई दाई भनेको ।” मैंले प्रष्ट पारें।
“तेरा बा आमा मेरा काकाकाकी कसरी भए ? अनि मैंले तेरा बा आमालाई काकाकाकी भनेको के प्रमाण छ ? ” दाईले थप निहुँ खोजे ।
“तर पानीको पालो त मेरो हो नि !” मैंले भनें ।
“पालो न सालो । मेरो खेत भरिएपछि तेरो पालो । भाग !”
साविक नेकपादेखि नै ओली पक्षमा लागेका माओवादी नेता बादलसहितका करिब दुई दर्जन नेताहरूलाई पार्टीको केन्द्रमा समेट्ने पार्टीको कदमलाई सो पक्षले स्वीकार गरेन ।
आज साढे चार दशकपछि एमालेमा यस्तै निहुँ खोजाइ देखेर अचम्म लागेको छ । एमाले ब्युँतिएपछि पार्टी अध्यक्ष तथा प्रधानमन्त्री के पी शर्मा ओलीले मंसिरमा पार्टी महाधिवेशन गरौं, त्यस प्रयोजनका लागि महाधिवेशन आयोजक कमिटी बनाऔं भन्दा माधव पक्षलाई मान्य भएन । जेठ २ को पार्टी संरचनामा नगई हुदै हुदैन भन्यो ।
साविक नेकपादेखि नै ओली पक्षमा लागेका माओवादी नेता बादलसहितका करिब दुई दर्जन नेताहरूलाई पार्टीको केन्द्रमा समेट्ने पार्टीको कदमलाई सो पक्षले स्वीकार गरेन ।
पहिले जेठ २ अगाडिको संरचनाको बैठक बसौं अनि उनीहरूको बारेमा सोचौंला भन्ने तर्क अगाडि सारियो । ती नेताहरूलाई अलपत्र पारेर माओवादीमै फर्किउन् भन्ने गलत मनसाय राखियो ।
पार्टी नेतृत्वले हदैसम्मको लचकता देखाएर पार्टीलाई जेठ २ मा फर्काउन तयार रहेको तर एमालेको सरकार गिराएर देउबाको सरकार बनाउन गरिएका हस्ताक्षर फिर्ता लिन आग्रह गर्यो । फेरि अत्तो थापियो-ओलीले माफी नमागी हस्ताक्षर फिर्ता हुदैन ।
एमालेका पूर्व महासचिव माधव नेपालले सगर्व घोषणा गरे-ओलीको ‘प्रलोभन’मा फसिदैन । देउबासंगको सहकार्य तोडिदैन !
पार्टीले फेरि लचकता देखायो । एकतालाई उच्च प्राथमिकता दियो । माधव पक्षको सर्तबमोजिम नेकपा(एमाले)को दशौं राष्ट्रिय महाधिवेशन आयोजक कमिटीलाई केन्द्रिय कमिटीमा रुपान्तरण गरेको छ ।
जेठ २ गते पूर्बको केन्द्रिय कमिटीलाई ब्यँतायो । सबै पदाधिकारी कायम गर्यो । अनुशासनमा परेका नेताहरूको कारबाही निस्कृय परियो । पार्टी एकताका लागि उनीहरूका सबै माग र सर्त पूरा गरियो ।
तर निहुँ खोज्ने र अत्तो थाप्ने काम रोकिएन ।
“हामीलाई नसोधी किन जेठ २ मा फर्किएको ?”
“पार्टी अध्यक्ष र प्रधानमन्त्रीबाट ओलीले राजिनामा किन नदिएको ?”
“बादलसहितका अरू माओवादी नेताहरूलाई किन जिम्मेवारी दिएको ?”
“संसद विघटन गरेको गल्तीमा किन सार्वजनिक रुपमा माफी नमागेको ?”
“विधि विधान किन मिचेको ? सुल्टो हिड्नु पर्नेमा उल्टो किन हिडेको ?”
“एमाले एकतामा गइन्न, विधि,पद्धति र निष्टाको राजनीति छोडिन्न ।”
“समानान्तर गतिविधि कायम हुन्छ, देउबाको साथ छोडिन्न ।”
“ओलीले भनेर हुन्छ? हामी मान्दैनौं ।”
मेरा सँधियार दाईको भन्दा यो निहुँ खोजाई धेरै चर्को छ । एमाले एकताबद्ध होला भन्नेमा त्राहि त्राहि छ । देउबा र प्रचण्डले डिजाइन गरेका नयाँ-नयाँ अत्तोहरू थपिदैछन् । नयाँ-नयाँ बखेडाहरू थपिदैछन् । तर यो कहिलेसम्म ?
प्रतिक्रिया