काठमाडौँ, २४ भदौ । नेपालमा वुधबार थप १ हजार ८१ जनामा कोरोनाभाइरस संक्रमण देखिएको छ ।
यससँगै संक्रमितको संख्या ४९ हजार २ सय १९ जना पुगेको छ भने ३३ हजार ८ सय ८२ जना निको भएका स्वास्थ्य तथा जनसंख्या मन्त्रालयका प्रवक्ता प्रा. डा. जागेश्वर गौतमले जानकारी दिए । त्यस्तै, देशभर हाल १५ हजार २५ जना सक्रिय संक्रमित रहेका मन्त्रालयले जनाएको छ ।
वुधबार सबैभन्दा धेरै काठमाडौँ जिल्लामा ३ सय ९४ जना संक्रमित थपिएका छन् । त्यस्तै, मोरङमा ७७ जना, सुनसरीमा ५६ जना, रौतहटमा ७० जना, सिराहामा ८१ जना, मकवानपुरमा ४२ जना, भक्तपुरमा ३६ जना, ललितपुरमा ३४ जना र रुपन्देहीमा ४२ जनामा संक्रमण देखिएको मन्त्रालयले जनाएको छ ।
मन्त्रालयका अनुसार हाल ७ जिल्लामा ५ सय जनाभन्दा धेरै सक्रिय संक्रमित छन् । जसमा सुनसरी, सर्लाही, काठमाडौँ, चितवन, भक्तपुर, ललितपुर र रुपन्देहीमा ५ सयभन्दा बढी संक्रमित रहेका छन् ।
उता ५ जिल्लामा हाल संक्रिय संक्रमित शून्य रहेका छन् । मनाङ, मुस्ताङ, डोल्पा, मुगु र हुम्लामा सक्रिय कोरोना संक्रमित नभएको मन्त्रालयले जनाएको छ ।
हालसम्म कोरोनाका कारण ३ सय १२ जनाको मृत्यु भइसकेको छ ।
प्रतिक्रिया