महिला प्रहरीलाई टिभीएस स्कुटर उपहार

पर्वत, ४ चैत ।  झन्डै एक दशकदेखि अष्ट्रेलियामा बस्दै आएका एक प्रवासी नेपालीले जिल्ला प्रहरी कार्यालय पर्वतको महिला तथा बालबालिका एकाइलाई स्कुटर सहयोग गरेका छन् । पर्वतको सदरमुकाम कुस्मा बजारका स्थायी बासिन्दा शङ्कर लामिछानेले महिला तथा बालबालिका एकाइलाई स्कुटी सहयोग गर्नुभएको छ ।

शान्ति सुरक्षामा सबै समय खटिनुपर्ने तर उनीहरु साधनस्रोतमा पुरुष प्रहरीभन्दा कमजोर हुने भएकाले स्कुटर सहयोग गरेको सहयोगदाता लामिछानेले बताउनुभयो ।

उहाँले टिभीएस कम्पनीको झन्डै रु एक लाख ७० हजार मूल्य पर्ने स्कुटर सहयोग गर्नुभएको हो । “मैले महिला प्रहरीको सक्रियता र महिला हिंसा न्यूनीकरणमा उहाँहरुको काम महत्वपूर्ण हुने भएकाले स्कुटर सहयोग गरेको हुँ” लामिछानेले भन्नुभयो ।

आफ्नो तीजगीतको एल्बम ‘यो मनको चाहना’ विमोचन कार्यक्रममा उहाँले महिला प्रहरी एकाइमा कार्यरत महिला प्रहरी जवानलाई स्कुटरको साँचो हस्तान्तरण गर्दा कार्यक्रमका आयोजक र सहयोग लिने सबै आश्चार्यचकित बनेका थिए ।

लामिछानेले कसैलाई पनि स्कुटर सहयोग गर्नेबारे यसअघि जानकारी दिनुभएको थिएन ।