नेविसंघका दाङ कोषाध्यक्ष पक्राउ, १० दिन हिरासतमा राखेर अनुसन्धान गर्न अनुमति

घोराही, १८ मंसिर । नेविसंघ दाङका कोषाध्यक्ष अरूण लहरे पक्राउ परेको जिल्ला प्रहरि कार्यालय दाङले जनाएको छ ।

अनेरास्ववियु राप्ती बबई क्याम्पस तुलसीपुरका अध्यक्ष रविन वलीलाई कुटपिट गरेका लहरे यसअघि फरार थिए । लहरेलाई पक्राउ गरेर अनुसन्धान सुरु गरिएको दाङ्का प्रमुख जिल्ला अधिकारी गोबिन्द रिजालले जानकारी दिए ।

लहरेले केही दिनअघि वलीलाई क्याम्पस प्रांगणमा बिना कारण कुटपिट गरेका थिए । लहरेलाई प्रहरी मंगलबार तुलसीपुर बजारबाट पक्राउ गरी सार्वजनिक नैतिकता विरुद्धको मुद्दा चलाएको जिल्ला प्रहरी प्रमुख जनक भट्टराईले जानकारी दिए ।

इप्रका तुलसीपुर प्रमुख डीएसपी हरिहरनाथ योगीका अनुसार उनलाई जिल्ला प्रशासन कार्यालय दाङले १० दिन हिरासतमा राखि अनुसन्धान गर्न प्रहरीलाई अनुमति दिएको छ ।

यसअघि लहरे केही वर्षअघि ट्रक लुटपाटको आरोपमा समेत पक्राउ परेका थिए ।