नियमविपरीत होटल व्यवसाय गर्ने पक्राउ

कास्की, २२ साउन । नियम विपरित होटल व्यवसाय गर्ने संचालिका ममता देवी महतोलाई मंगलबार प्रहरीले पक्राउ गरेको छ । पोखरा महानगरपालिका ८ पृथ्वीचोकस्थित कोशी एण्ड रितिक रेष्टुरेन्टकी संचालिका पक्राउ परेकी हुन् ।

होटलमा बास बस्न आएका ग्राहकको नियमानुसार अभिलेख राख्नुपर्नेमा सो नराखी होटल व्यवसाय तथा मदिरा बिक्री वितरण (नियन्त्रण) ऐन, २०३३ विपरीतको कसूर गरेकोले जिल्ला प्रहरी कार्यालय कास्कीबाट खटिएको प्रहरीले महतोलाई पक्राउ गरेको हो ।

महतोले गत जेठ ३० गते भारत घर भएका ३ जनालाई आफ्नो होटलमा बास बस्न दिई कुनै अभिलेख नराखेको र ती व्यक्तिहरु समेत भई योजना बनाई लक्ष्मी परियारको हत्या गरेको समेत अनुसन्धानबाट खुल्न आएको छ ।

महतोलाई थप कानुनी कारवाहीको लागि आन्तरिक राजश्व कार्यालय, पोखरा पठाइएको जिल्ला प्रहरी कार्यालय कास्कीले जनाएको छ ।