काठमाडौं, २२ कात्तिक । संविधानको विवादित विषयमा सहमति जुटाउन बस्ने बैठकहरुमा सरकार प्रमुख र संविधानसभाको सबैभन्दा ठूलो दलको नेताका हैसियतले प्रधानमन्त्री सुशील कोइरालाको भूमिका र माग धेरै छ ।
संवैधानिक राजनीतिक संवाद तथा सहमति समितिका सभापति बाबुराम भट्टराईले त उनलाई भेटेरै सहमतिको पहल गर्न पटकपटक आग्रह पनि गरेको समाचार आजको नयाँ पत्रिका दैनिकले छापेको छ । तैपनि,त्यस्तो बैठकहरुमा प्रधानमन्त्री कोइराला रुची नै देखाउँदैनन् ।
संयुक्त राष्ट्रसंघको महासभामा भाग लिएर अमेरिकाबाट फर्केपछि कोइराला शीर्षतहका एक–दुई बैठकमा मात्रै सहभागि भएका छन्,त्यो पनि एमाओवादीले आपत्ति जनाएपछि ।
आफ्नो सरकारी निवास बालुवाटारबाहिर हुने बैठकमा उनी सहभागि छैनन् । अमेरिकाबाट फर्केयता संवैधानिक राजनीतिक संवाद तथा सहमति समितिको बैठकमा त कोइराला एकपटक पनि सहभागि भएनन् । उनी समितिका सदस्य पनि हुन् ।
प्रधानमन्त्रीका प्रेस संयोजक प्रकाश अधिकारीका अनुसार संसद् खुलाउन एकीकृत माओवादीसँग भएको छलफलमा कोइराला उपस्थिजत भएका थिए ।
त्यसयता उनी एकदुई बैठकमा मात्रै सहभागि भए । आफू सहभागि नभए पनि प्रधानमन्त्रीले अरु नेतालाई वार्ता,संवाद र सहमति गर्ने जिम्मा दिएको अधिकारीले बताए ।
प्रतिक्रिया