संसदबाट सांसदहरू एकाएक गायब

काठमाडौं, २१ साउन । आवश्यक गणपुरक सङ्ख्या (कोरम) नपुगेपछि व्यवस्थापिका संसद्को बैठक दुई दिनका लागि स्थगित भएको छ ।  शुक्रबारको बैठकको प्रारम्भमा ४७७ सांसदको हाजिर भए पनि कोरम यकिन गर्दा ९७ जना सांसदमात्र फेला परेका थिए ।

हाजिर गरेर ३८० सांसद बेपत्ता भएपछि सदनको बैठक नियमित कार्यसूचीमा प्रवेश गर्न सकेन ।  सांसदहरूले सदनको बैठकमा एक दिन उपस्थित भएर हाजिर गरेबापत एक हजार रुपियाँ भत्ता पाउँछन् ।   गोरखापत्र दैनिकले समाचार छापेको छ ।

गणपुरक सङ्ख्या नपुग्दा संवैधानिक आयोग गठनसम्बन्धी तीन विधेयक पारित हुन सकेनन् ।  सांसदहरू हाजिर गरेर फर्किएपछि महत्वपूर्ण विधेयक पारित भएनन् ।

शुक्रबार मधेसी आयोग, मुस्लिम आयोग तथा थारू आयोग गठनसम्बन्धी विधेयक पारितको कार्यसूची थियो ।

यस्तै अपाङ्गता भएको व्यक्तिको अधिकारसम्बन्धी विधेयक पनि पारितको कार्यसूची थियो ।  तर, गणपुरक सङ्ख्या नपुगेपछि विधेयक पारित प्रक्रियामा सदन प्रवेश गर्न सकेन ।

जातीय भेदभाव तथा छुवाछुत कसुर विधेयक संशोधन दर्ताका लागि अनुमोदनका क्रममा गणपुरक सङ्ख्याको प्रश्न उठाइएको थियो ।

नेपाल मजदुर किसान पार्टीका डिल्लीप्रसाद काफ्लेले गणपुरक सङ्ख्या यकिन गर्न माग गर्नुभएको थियो ।  काफ्लेको मागपछि सभामुख ओनसरी घर्तीले तीन मिनेट जनाउ घन्टी बजाएर गणपुरक सङ्ख्या यकिन गर्न सचिवालयका कर्मचारीलाई निर्देशन दिनुभएको थियो ।  जनाउ घन्टीपछि सङ्ख्या यकिन गर्दा ९७ मात्र सांसदको उपस्थिति रहेको हो ।

संविधानको धारा ९४ को व्यवस्थाअनुसार कुनै पनि प्रस्ताव निर्णयार्थ पेस गर्न कम्तीमा एक चौथाइ सदस्यको उपस्थिति अनिवार्य हुन्छ ।  हाल संसद्मा ५०२ सांसद छन् ।  सङ्ख्याअनुसार कोरमका लागि १४८ सदस्य आवश्यक पर्छ ।

संसद्मा विभिन्न चरणमा अहिले पनि ४५ भन्दा बढी विधेयक विचाराधीन छन् ।  निर्वाचन विधेयकहरू सम्बन्धित समितिमा विचाराधीन छन् ।  बुधबार संविधानअनुसार गठन हुनुपर्ने तीन नयाँ आयोग गठनसहित चार विधेयक पारितको कार्यसूची थियो ।  मधेसी, मुस्लिम र थारू आयोग गठन विधेयकसँगै अपाङ्गता भएका व्यक्तिको अधिकारसम्बन्धी विधेयक अनुमोदनको कार्यसूची थियो ।  यस्तै, भूपरिवेष्ठित राष्ट्रको प्रबुद्ध समूह गठनसम्बन्धी सम्झौता पेस गर्ने पनि कार्यसूचीमा थियो ।

संसद् सचिवालयका प्रवक्ता भरतराज गौतमले महत्वपूर्ण विधेयक अनुमोदनको चरणमा गणपुरक सङ्ख्या नै नपुग्नु गलत अभ्यास भएको बताउनुभयो ।  गौतमले भन्नुभयो, ‘धेरै रणनीतिक र महत्वपूर्ण विधेयक संसद्मा छन् ।  आजमात्रै चार विधेयक पारितको कार्यसूचीमा थिए ।  कतिपय विधेयक तोकिएको समयमा सक्नुपर्ने अवस्थाका छन् ।  विधेयक पारितका क्रममा समेत कोरम नपुग्नु दुखद् हो । ’ गणपुरक सङ्ख्या नपुगेपछि संसद् बैठक आइतबार १ बजेसम्मका लागि स्थगित गरिएको छ ।  महत्वपूर्ण विधेयक पारितको कार्यसूची रहेको शुक्रबारको बैठकमा सुरुमा ४७७ सांसदको उपस्थिति हाजिर थियो ।  तर, सदनमा गणपुरक सङ्ख्या यकिनका क्रममा ९७ जनामात्र सांसद उपस्थित हुनुहुन्थ्यो ।