विराटनगर, ९ चैत । मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले संविधान कार्यान्वयनका लागि निर्वाचन अपरिहार्य भएको बताउनुभएको छ ।
सो पार्टीद्वारा आज विराटनगरमा आयोजित कार्यकर्ता भेलामा उहाँले संविधान कार्यान्वयनको पहिलो सर्त स्थानीय तहको निर्वाचन भएकाले त्यसको तयारीमा जुट्न कार्यकर्तालाई निर्देशन दिनुभयो ।
अध्यक्ष गच्छदारले मधेसी मोर्चालगायत असन्तुष्ट पक्षलाई स्थानीय तहको निर्वाचनमा सहभागी गराउने वातावरण बनाउन सरकारलाई आग्रह गर्नुभयो । उहाँले भन्नुभयो –‘सरकारले प्रस्तुत गरेका संविधान संशोधन विधेयक परिमार्जन गरेर पारित भए मात्र निर्वाचनको वातावरण बन्न सक्छ ।’
मधेसी, थारु, आदिवासी जनजातिको मागलाई सम्बोधन गर्न मधेसमा तीन र पहाडमा पाँच प्रदेश बनाउन सक्नुपर्दछ, अध्यक्ष गच्छदारले भन्नुभयो– ‘प्रमुख राजनीतिक दलहरू आफ्नो निर्णय र अडानमा बस्न नसकेकाले मुलुकमा राजनीतिक स्थिरता आउन नसकेको र गतिरोध बढ्दै गएको छ ।’
उहाँले मुलुकको बिधमान समस्या निकासका लागि प्रमुख राजनीतिक दललाई दूरदर्शी निर्णय गर्न र मधेसी दललाई पनि अनावश्यक अडान नलिन आग्रह गर्नुभयो ।
सम्मानजनक स्थिति बने नेपाली काँंग्रेससँग एकीकरण हुनसक्ने बताउँदै अध्यक्ष गच्छदारले भन्नुभयो – ‘एकीकरणको अवस्था नभएपनि निर्वाचनका लागि समीकरण हुन सक्ने सम्भावना बढेर गएको छ ।’ रासस
प्रतिक्रिया