काठमाडौँ, ३१ साउन । १० दिन अघि काठमाडौको भीमढुंगामा प्रहरी कारबाहीमा मारिएका भनिएका चर्चित गुण्डा नाइके दिनेश अधिकारी ‘चरी’ को शनिबार पोस्टमार्टम भएको छ।
पोस्टमार्टम भएपनि लाश भने उनको परिवारले बुझ्न मानेका छैनन । पोस्टमार्टम गर्दा चरीको शरीरमा सात गोली लागेको उनका परिवारले जानकारी दिएका छन् ।
परिवारले दिएको जानकारी अनुसार चरीलाई हानेको ६ गोली पछाडिबाट अगाडि निस्किएको र एक गोली मेरुदण्डले छेकेर राखेको पत्ता लागेको छ ।
चरीका परिवारले पोस्टमार्टमपछि घटना झन शंकास्पद भएको दाबी गरेका छन् । उनीहरुले सत्य तथ्य छानबिन नगरेसम्म लाश नबुझने बताएका छन् ।
अदालती कारबाहीका लागि मृत्यु भएको आधिकारिक कागजात आवश्यक पर्ने भएकाले चरीका परिवारले पोष्टमार्टम गर्न अनुमति दिएपछि चरीको पोष्टमार्टम गरिएको हो ।
हत्यामा संलग्न रहेकाको कारबाहीको माग गर्दै चरीका परिवारले शुक्रबार चार प्रहरी अधिकारीसहित पाँचजनाविरुद्ध सर्वोच्च अदालतमा रिट दायर गरिसकेका छन् ।
सर्वोच्चमा दायर गरेको रिटमा चरीको हत्या षडयन्त्रपूर्वक भएको र प्रहरीले किटानी जाहेरी लिन नमानेको भन्दै घटनामा संलग्न उपर कारबही गर्न माग गरिएको छ ।
रिटमा महानगरीय प्रहरी परिसर हनुमानढोकालाई किटानी जाहेरी लिन पनि परमादेश माग गरिएको छ ।
रिटमा अपराध अनुसन्धान महाशाखाका प्रमुख एसएसपी पुष्कर कार्की, महानगरीय प्रहरी परिसर हनुमानढोकाका प्रमुख एसएसपी उत्तम कार्की, अपराध महाशाखाकै डिएसपी मीरा चौधरी, इन्सपेक्टर कुमुद ढुंगेल र चरीकी प्रेमिका खुस्बु ओलीका भूपू प्रेमी अर्पण कोइरालालाई विपक्षी बनाइएको छ । रिट दायर गर्न खुस्बु पनि अदालत पुगेकी थिइन् ।
यसअघि अपराध अनुसन्धान महाशाखा र महानगरीय प्रहरी आयुक्तको कार्यालयमा किटानी जाहेरी दर्ता गर्न जाँदा प्रहरीले त्यसै फर्काइदिएको थियो ।
प्रहरीले जाहेरी बुझ्न नमानेपछि आफुहरु अदालत धाउन बाध्य भएको चरीका दाजु ध्रुबले बताए । रिटको पहिलो पेशी सोमवार तोकिएको छ ।
चरीका परिवारले उनको शव पोष्टमार्ट गर्न जापान वा अमेरिका लैजान पाउनुपर्ने माग गर्दै आएका थिए ।
अझै पनि चरीका परिवारले मुद्धाको किनारा नलागेसम्म शव नवुझ्ने अडान लिएका छन् ।
प्रतिक्रिया