काठमाडौं, १७ बैशाख । प्रहरीले नक्कली इन्जिनियरलाई धमाधम पक्रिन थालेको छ ।
केन्द्रीय प्रहरी समाचार कक्षका अनुसार इन्जिनियरको नक्कली प्रमाणपत्र बनाई नेपाल इन्जिनियरिङ परिषदमा दर्ता गराई केही इन्जिनियरहरुले काम गरिरहेको भन्ने गोप्य सूचनाको आधारमा महानगरीय अपराध महाशाखाबाट खटिएको अनुसन्धान टोलीले शुक्रबार थप २ जना नक्कली इन्जिनियरलाई पक्राउ गरेको छ ।
पक्राउ पर्नेहरुमा गोरखा, गोरखा नगरपालिका-९ का २९ बर्षीय सन्देश घिमिरे र गोरखा खोप्लाङ गाबिस–२ का २९ वर्षीय श्रीराम आचार्य रहेका छन् ।
ललितपुर उपमहानगरपालिका–१८ गाबहालस्थित कम्प्यूटर डिजाईनर कार्यालयमा महाशाखाले बैशाख १४ गते छापा मारी नक्कली कागजात तयार पार्ने व्यक्ति तथा उक्त कागजातहरुको प्रमाणित प्रतिलिपि प्रयोग गरी नेपाल ईन्जिनियरिङ परिषदमा दर्ता गराउने व्यक्ति एवं केही नक्कली इन्जिनियरहरु समेतलाई पक्राउ गरेकोमा थप अनुसन्धान गर्ने क्रममा उनीहरु २ जना पक्राउ परेका हुन ।
उनीहरुलाई थप अनुसन्धानको लागि महानगरीय प्रहरी परिसर ललितपुर पठाएको र यस सम्बन्धमा थप अनुसन्धान कार्य समेत जारी रहेको महाशाखाले जनाएको छ ।
यसअघि बुधबार पाँच जना र विहीबार पाँच जना नक्कली इन्जिनियरलाई प्रहरीले नियन्त्रणमा लिएको थियो ।
प्रतिक्रिया