काठमाडौं, १४ वैशाख । प्रधानमन्त्री केपी ओलीले भूकम्पपीडित जनतालाई आगामी असारभित्रै छानामुनि ल्याइने बताउनुभएको छ ।
प्रमुख विपक्षी दल कांग्रेसका सांसदको प्रतिनिधिमण्डलले भूकम्प प्रभावित क्षेत्रको पुनःनिर्माणमा भएको ढिलाइ सम्बन्धी ज्ञापनपत्र बुझ्दै प्रधानमन्त्री ओलीले भूकम्पपीडित जनताको उचित व्यवस्थापनका लागि सरकारले जोडतोडका साथ काम गरिरहेको बताउनुभयो ।
अघिल्लो सरकारका पालामा दातृ निकायको सहयोग परिचालन गर्न भएको सहमति अनुसार नै पुनःनिर्माणको प्रक्रिया अघि बढेको जानकारी गराउँदै उहाँले भन्नुभयो, ‘पुनःनिर्माणका सम्बन्धमा यथार्थपरक दृष्टिकोण र पारस्परिक सहयोगको आवश्यकता हुनुपर्छ ।’
दोस्रो संविधानसभाको निर्वाचनपछि कुनै दलको बहुमत नआएपछि आफूलाई पनि प्रधानमन्त्री बन्न अफर आएको स्मरण गर्दै प्रधानमन्त्री ओलीले भन्नुभयो, ‘मैले कांग्रेसको सहयोग, सल्लाह र समर्थनमा मात्र सरकार बनाउनुपर्छ भनेको थिएँ ।’
आफ्नो सक्रियतामा कांग्रेसको नेतृत्वमा सरकार बनेको बताउँदै उहाँले कांग्रेस र एमालेबीच भएको भद्र सहमतिपछि सरकार बनेको र आफूले कहिल्यै सार्वजनिक रुपमा सरकारको आलोचना नगरेको अवगत गराउनुभयो ।
प्रतिक्रिया