काठमाडौँ, १ चैत । पश्चिमी वायुको प्रभावका कारण देशभरको मौसममा खराबी आएको छ ।
उक्त वायुको प्रभावले देशका अधिकांश भागमा बदली हुनुका साथै पश्चिमका केही भेगमा वर्षा भएको मौसमविद् शान्ति कँडेलले राससलाई जानकारी दिनुभयो ।
“मौसम बदली आज दिनभर रहन्छ, खासगरी पहाडी भेगमा वर्षा र उच्च हिमाली भेगमा हिमपात हुने सम्भावना छ । काठमाडौँ उपत्यकामा साँझपख क्षणिक वर्षा हुने देखिन्छ”- उहाँले भन्नुभयो ।
पश्चिमका अधिकांश भेगमा आइतबारदेखि नै क्षणिक वर्षा हुने क्रम जारी रहेको छ ।
मौसम पूर्वानुमान महाशाखाका अनुसार आइतबार बिहानदेखि सोमबार बिहानसम्म दिपायलमा ३० मिलिमिटर, धनगढी र वीरेन्द्रनगरमा २२ समान मिलिलिटर वर्षा भएको छ । नेपालगन्ज, दाङ, जुम्ला, डडेलधुरालगायतका स्थानमा पनि हल्का वर्षा भएको छ ।
देशको पश्चिमी भेगबाट आइतबारदेखि नै सक्रिय प्रणाली अहिले क्रमशः पूर्वतर्फ सरेको भए पनि पश्चिमका अधिकांश भेगमा आज पनि बदली भएको छ ।
काठमाडौँ उपत्यकासहित देशभरको मौसममा भोलि बिहान केही सुधार आए पनि दिउँसो पुनः बदली हुने र बुधबारदेखि मात्र मौसममा सुधार आउने मौसमविद् कँडेलको भनाइ छ ।
आज काठमाडौँ उपत्यकाको न्यूनतम तापक्रम १०.५ र अधिकतम तापक्रम २२ देखि २४ डिग्री सेल्सियसको हाराहारीमा रहेको महाशाखाले जनाएको छ । रासस
प्रतिक्रिया