मुम्बई । बलिउड बादशाह शाहरुख खानले सानो गल्तिका कारण ठूलो जरिवाना भोग्नुपरेको छ ।
उनलाई मुम्बई नगर निगमले बान्द्रामा आफ्नो दरबार ‘मन्नत’को बाहिर अवैध र्याम्प अर्थात पर्खाल बनाएको भन्दै १ लाख ९३ हजार रुपैयाँ जरिवाना गरेको हो । उनले बनाएको पर्खाललाई नगर निगमले यसअघि नै भत्काइदिएको थियो ।
उक्त पर्खाल निर्माण गर्न कम्पत्तीमा पनि १५ लाख लागेको हुनसक्ने अनुमान गरिएको थियो । त्यो १५ लाख तथा अहिले दुई लाख गरी पर्खाल बनाउने सानो गल्तिका कारण शाहरुखले झण्डै १७ लाखको नोक्सानी व्यहोर्नुपरेको हो ।
एक आरटीआई (सूचनाको अधिकार) अन्तर्गत परेको आवेदनमा यसको खुलासा विहीबार भएको हो । कार्यकर्ता अनिल गलगलीले आरटीआई अन्तर्गत शाहरुखको दरबार बाहिर निर्माण भएको अवैध पर्खालबारे जानकारी मांगेका थिए ।
अनिलका साथै अन्य सर्वसाधारण र कार्यकताहरुको अभियानपछि बाध्य भएर नगर निगमका आयुक्तले शाहरुखलाई कारवाही गर्दै ६ फ्रेवअरीमा नोटिस पठाएका थिए । बीएमसीले नोटिस अवधि समाप्त हुँदा पनि कुनै जवाफ नआएपछि पर्खाल तोडेको थियो । र अन्य कारवाही सुरु गरेको थियो ।
कार्यकर्ताहरुको आरोप थियो कि पर्खाल बनाएर शाहरुखले सार्वजनिक जमीन कब्जा गरेका थिए । त्यो आरोपपछि बीएमसीले शाहरुखको पर्खाल तोड्दै १.९३ लाख रुपैयाँको जरिवानासहित अन्तिम नोटिस पठाएको थियो ।
उक्त नोटिसपछि शाहरुखले घटनालाई अन्त्य गर्दै चुपचाप चेकमार्फत जरिवाना तिरेको समाचार भारतीय च्यानल आजतकले प्रकाशित गरेको छ ।
प्रतिक्रिया