काठमाडौं । पार्टी गठन भइनसक्दै बाबुराम भट्टराईको नयाँ शक्ति नेपालमा चरम विवाद चर्किएको छ ।
आइतबार केन्द्रीय परिषद्का नाममा सेलिब्रेटिज, डाक्टर र गैरसरकारी संस्थानका मानिसलाई मात्र समेटेर पार्टी सार्वजनिक गरेपछि तिमी र हामी भन्दै चर्काचर्की परेको हो । सो दिन बिहानै रामेश्वर खनालसहित केही नयाँ अनुहारका मानिससँग बसी बाबुरामले ३५ सदस्यीय केन्द्रीय परिषद् छनोट गरेका थिए ।
छनोटका क्रममा एमाओवादी केद्रीय समितिलाई छाडेर उनैलाई सर्वेसर्वा मानेर आएको पूर्वमाओवादी नेतालाई सहभागी गराइएको थिएन । तर, उनीसँगै सुरु देखिनै नयाँ शक्ति निर्माण संलग्न २९ जना पूर्वमाओवादी केन्द्रीय सदस्यलाई भने दर्शकदीर्घामा समेटिएको थियो ।
पार्टीको नामसहित केन्द्रीय परिषद् घोषणा हुनासाथ दर्शकदीर्घामा बसेर आफूहरु पनि समेटिने आशामा टोलाइरहेका पूर्वमाओवादी केन्द्रीय सदस्यहरुको नाम आएन । यसपछि त त्यहाँ बितण्डा नै सुरु भयो । उनीहरुले एकापसमा चरम असन्तुष्टि र निराशा व्यक्त गर्न थाले ।
उनीहरुकै पहलमा साँझ ४ बजे एमाओवादी केन्द्रीय समितिबाट छुट्टिएका २९ भाइको भट्टराई निवास सानेपामै आकस्मिक बैठक बोलाइयो । बैठकको सुरुदेखि नै केन्द्रीय परिषद्मा नसमेटिएकाले आक्रामक ढंगले बाबुरामलाई गाली गर्दै भनाइ राखे ।
उनको यस्तो शैलीले राजनीतिक पार्टी होइन, फिल्म निर्माण उद्योग बन्ने धारणा आयो । जनआस्था साप्ताहिकमा खबर छ ।
प्रतिक्रिया