ओलीसँग भेटेपछि महतोको बोली नरम, माखे साङ्गलो र बिहारको यसरी भयो व्याख्या

काठमाडौं, ४ माघ । सद्भावना पार्टीका अध्यक्ष एवम् मधेसी मोर्चाका नेता राजेन्द्र महताले प्रधानमन्त्री केपी ओलीसँग आइतबार साँझ बालुवाटारमा भेट गरेपछि अचानक सार्वजनिक अभिब्यक्तिहरूलाई मत्थर बनाएका छन् ।

प्रधानमन्त्री ओलीको चर्को आलोचना गर्दै आएका अध्यक्ष महताले आफ्ना अभिव्यक्तिहरू कुनै व्यक्तिविरुद्ध नरहेको प्रतिक्रिया दिएका छन् । आज बिहान पत्रकार ऋषि धमलासँग नेपालवाणी रेडियो नेटवर्कमा कुराकानी गर्दै सद्भावना अध्यक्ष महतोले प्रधानमन्त्री ओली र आफ्नो विषयमा मिडियाले गलत प्रचार गरेको आरोप लगाए ।

‘प्रधानमन्त्री जी र मेरोबीचमा कुनै व्यक्तिगत रिसिइबी छैन’, महताले भने, ‘मिडियाले गलत लेखिदिन्छ । म कहिल्यै पनि वार्ता विरोधी छैन । वार्ता छाडेर भाग्दैन ।’

अध्यक्ष महताले वार्तामा नबस्ने हो भने समस्याको समाधान नचाहेको र वार्तँ विथोल्न लागेको आरोप लाग्ने भएकाले आफू काठमाडौं आएको बताए । उनले आज दिनभरि राजनीतिक वार्ता र सम्वादहरू गरेर भोलि मंगलबार तराई जाने बताए ।

‘म वार्ता विरोधी होइन । कुनै व्यक्तिसँग मेरो रिसिइबी छैन । केपी ओलीसँग पनि दुश्मनी छैन । ‘तराईमा यूपी बिहारलाई पनि मिसाउन’ भनेको विषयमा ओली जीले हिजोको भेटवार्तामा स्पष्टीकरण दिनुभएको छ । ‘माखो साङ्लो’को परिभाषा ओली जीले डिस्नेरी ल्याएर जानकारी गराउनु भयो । व्याख्या गर्नुभयो । धेरै समय लगाएर स्पष्टीकरण दिने प्रयास गर्नुभयो । ओली र मेरो विषयमा मिडियाले गलत लेखेको मैले थाहा पाएँ ।’

यसअघि प्रधानमन्त्री ओली र सद्भावना अध्यक्ष महतोबीच अत्यन्तै कटुता थियो । जसका कारण राजनीतिक असहजता बढेको जनाइएको थियो ।