काठमाडौँ । आँखामा आँसु नली बन्द भएमा गरिने उपचार प्लास्टिक शल्यक्रियासम्बन्धी दुईदिने कार्यशाला यहाँ सुरु भएको छ ।
तीलगङ्गा आँखा प्रतिष्ठानको आयोजनामा नयाँ प्रविधिबाट दक्ष जनशक्ति उत्पादन गर्नका लागि देशका विभिन्न स्थानका दश र प्रतिष्ठानकै आँखा चिकित्सक कार्यशालामा सहभागी छन् ।
लगातार आँसु आइरहने समस्याको बाहिरी घाउ नबनाई नाकभित्रबाट उपचार गरिने प्रविधिका बारेमा चिकित्सकलाई जानकारी दिनका लागि बुमरुनगार्ड इन्टरनेसनल अस्पताल थाइल्याण्डबाट डा नकावटसहितका चार सदस्य चिकित्सक काठमाडौँ आएको प्रतिष्ठानका आँखा विशेषज्ञ डा रोहित सैँजुले बताउनुभयो ।
आँखामा आँसुु जाने नली बन्द भएर आँखामा आँसु बगिरहने समस्याको उपचार बाहिर घाउ नबनाई इन्डोस्कोपीद्वारा शल्यक्रिया गरिने यो प्रविधि नेपालका युवा वर्गमा लोकप्रिय भए पनि पाका मानिसले भने आँखा बाहिर घाउ बनाई शल्यक्रिया गर्ने गरेको बताइएको छ ।
बढीमात्रामा महिलामा देखिने यो रोगको उपचार ग्रामीणस्तरसम्म पु¥याउन सरकारले पहल गर्नुपर्ने कार्यशालामा बताइएको थियो ।
यो प्रविधि अन्य प्रविधिभन्दा महँगो पर्ने चिकित्सकको भनाइ छ । यो उपचार तीलगङ्गा अस्पतालमा सन् २००८ देखि सञ्चालन गरिए पनि नयाँ प्रविधिका बारेमा नेपालका आँखा चिकित्सकलाई जानकारी दिन कार्यशाला आयोजना गरिएको आयोजकले जनाएको छ । रासस
प्रतिक्रिया