नाकाबन्दी गर्दैमा भारतको दबाबलाई हामी कुनै पनि हालतमा मान्दैनौं : कानुनमन्त्री

काठमाडौँ, २६ मङ्सिर । कानुन, न्याय तथा संसदीय मामिला मन्त्री अग्निप्रसाद खरेलले जनता, राष्ट्रियता र मुलुकको अखण्डतालाई अप्ठ्यारो पर्ने गरी प्रदेशको सीमा हेरफेर नहुने बताउनु भएको छ ।

तीनकुने सुविधानगरस्थित एकीकृत उपभोक्ता सङ्घको १२औँ वार्षिक साधारणसभालाई सम्बोधन गर्दै उहाँले भन्नुभयो, “नाकाबन्दी गरेर नेपाली जनताको घाँटी थिचेर प्रदेशको सीमालाई हेरफेर गर्न खोजिए त्यसलाई कुनै पनि हालतमा मान्न सकिदैन ।”

हिमाल, पहाड र तराई मिलेर बनेको देशलाई त्यसैअनुरुप प्रदेश कायम गर्नुपर्छ भन्नेमा आफूहरु दृढ रहेको बताउँदै मन्त्री खरेलले देशभित्रबाट उठाइएका कुरामा छलफल गरेर सहमतिमा पुग्न सकिने भए पनि बाहिरबाट हुने कार्यलाई कदापि स्वीकार गर्न नसक्ने बताउनुभयो । रासस