भारतको संसदमा नेपालबारे बहस- नरेन्द्र मोदीमाथि सांसदहरुको कडा प्रहार

काठमाडौं, २१ मंसिर । भारतको माथिल्लो सदन राज्यसभामा नेपालबारे बहस सुरु भएको छ ।

बहसमा भारतका थुप्रै सांसदहरुले नेपालको पक्षमा बोलेका छन् । उनीहरुले भारतीय प्रधानमन्त्री नरेन्द्र मोदीलाई प्रश्नै प्रश्नले कडा प्रहार गरेका छन् । बहसको सुरुवातमा बोल्दै जनता दल युनाइटेडका सांसद पवनकुमार बर्माले भारतले नेपालको आन्तरिक मामिलामा ‘बिग ब्रदर’को जस्तो व्यवहार देखाउन नहुने बताए । उनले यस्तो व्यवहार गरिरहेका मोदीको कडा शब्दमा आलोचना गरे ।

भारतीय राज्यसभामा कुन सांसदले के भने ?

पवनकुमार बर्मा (जनता दल युनाइटेड)
अन्तर्राष्ट्रिय मामिलाका जानकार समेत रहेका जनता दल युनाइटेडका सांसद पवनकुमार बर्माले भारतले नेपालको मामिलामा बिग ब्रदरको जस्तो व्यवहार देखाउन नहुने बताएका छन् । बेलायतसँग भारतले नेपालको मामिलामा संयुक्त वक्तव्य निकाल्नु पनि गल्ती भएको बर्माले बताए ।

एउटा सार्वभौम देशको आन्तरिक मामिलामा भारतले हस्तक्षेप गर्न नहुने र सहयोगी भूमिका मात्रै खेल्नुपर्ने बर्माको सुझाव छ । भारतीय प्रधानमन्त्री नरेन्द्र मोदीले नेपाल गएका बेला ऋषि मनले संविधान बनाउन भनेका थिए, अहिले के भयो भन्ने बर्माले प्रश्न सोधेका छन् ।

करण सिंह (भारतीय कांग्रेस)

भारतीय कांग्रेस पार्टीका नेता करण सिंहले नेपालमा राजनीतिक मात्रै नभई मानवीय संकट आएको भन्दै चाँडो नाकाबन्दीको अन्त्य गर्नुपर्ने बताएका छन् ।

संविधान बन्ने बेलामा भारतले विदेश सचिव जयशंकरलाई नेपाल पठाउनु गल्ती भएको भन्दै सिंहले मोदी सरकारको आलोचना गरे । उनले नेपाल भारतको एकदमै नजिकको मित्र भएको भन्दै त्यो सबै मोदीले विगारेको आरोप लगाए ।

रवि बर्मा सांसद
भारतीय सांसद रवी बर्माले नेपाल आतंकवादीको घर बन्ने हो कि भन्ने चिन्ता गरेका छन् । जे नेपालमा भइरहेको छ, त्यो ठीक भइरहेको छैन । भूकम्पको बेला नेपालमा पीडाको जुन झड्का थियो, अहिले त्योभन्दा बढी छ । हामीवीच रोटीबेटीको सम्वन्ध छ, र यसलाई कमजोर पार्नु हुँदैन । तर, राजाले सात पार्टीलाई सत्ता सुम्पिएपछि अन्तरिम संविधान आयो । र, धर्म निरपेक्षता संविधान आउँछ भन्ने निश्चित थियो । तर, अचानक अर्कै भयो । उनले भने । नेपालमाथिको नाकाबन्दी भारतले चाँडो भन्दा चाँडो खोल्नुपर्ने उनको माग थियो ।

शरद यादव (जनता दल युनाइटेड)
जनता दल युनाइटेडका नेता तथा भारतीय सांसद शरद यादवले नेपाल र भारतबीचको सम्बन्ध अरुभन्दा फरक भएको भन्दै सो सम्बन्ध बिग्रिएको बताए अब भारतीय विदेश मन्त्रालयले तत्काल केही गर्नुपर्ने यादवले जोड दिए ।
‘हामी ठूलो बनेर जानुहुँदैन र त्यो महसुस हुन दिनुहुँदैन । नेपालको विकट अवस्था सुल्झाउन विदेशमन्त्रीले तत्काल पहल थाल्नुपर्छ ।’ मोदी सरकारलाई सुझाव दिँदै उनले भने ।