काठमाडौं । गत साता आएको विनाशकारी आकस्मिक बाढी र पहिरोपछि भारत, चीन, जापान, अमेरिका, दक्षिण कोरिया लगायत विभिन्न देशबाट नेपालमा अन्तर्राष्ट्रिय सहायता आइरहेको छ ।
अगस्ट २६ मा चीन–नेपाल सीमा क्षेत्रमा विनाशकारी पहिरो गएको थियो । विपद्मा नेपालमा मृत्यु हुनेको संख्या १ हजार २२२ पुगेको नेपाल प्रहरीले बुधबार साँझ जारी गरेको विज्ञप्तिमा जनाएको छ ।
अन्तर्राष्ट्रिय दातृ निकाय तथा विभिन्न देशबाट पठाइएको सहयोगमा तत्काल आवश्यक पर्ने ड्रोन, डीएनए परीक्षण उपकरण तथा रिएजेन्ट, पानी शुद्धीकरण उपकरण र प्रकाशका सामग्रीलगायत छन् । सहयोगमा खाद्य सामग्री, औषधि तथा अन्य आवश्यक सामग्री पनि समावेश छन् ।
सडक सञ्जाल प्रभावित भएकाले बाढी प्रभावित समुदायसम्म हेलिकप्टरमार्फत राहत सामग्री पुर्याउने काम भइरहेको छ ।
विपद्बाट प्रभावितहरूका लागि विद्यालयमा अस्थायी आश्रयस्थल बनाइएको छ । विभिन्न सहायता संस्थाहरूले पनि पीडितहरूलाई खाना तथा अन्य आवश्यक सामग्री उपलब्ध गराउँदै आएका छन् ।
प्रभावित स्थानीयवासी सिर्जना साहले भनिन्, ‘हाम्रो आफ्नै घर हुँदा हामी राम्रोसँग खाना पकाएर खान सक्थ्यौँ। तर अहिले सडकमा बस्नुपरेको छ, त्यसैले त्यसरी खाना बनाउन सक्ने अवस्था छैन । मानिसहरूले खाना ल्याएर दिइरहेका छन्, त्यही खाइरहेका छौँ । यदि उनीहरूले खाना वितरण नगरेको भए हामी भोकै बस्नुपर्ने थियो । उहाँहरूले हामीलाई सहयोग गरिदिनुहोस् भनेर अनुरोध गर्न चाहन्छु । सहयोग गर्नुभयो भने धेरै राम्रो हुन्छ ।’
विपद्बाट प्रभावितहरूको सहयोगका लागि विश्वका विभिन्न भागबाट स्वयंसेवकहरू पनि नेपाल आएका छन् । चीनबाट आफ्नो टोलीसहित उपचारका लागि आएका डा. झाङ हाइजिङले ज्वरो, छालामा आउने समस्या तथा शरीर दुख्नेजस्ता सामान्य स्वास्थ्य समस्याबाट पीडित बाँचेकाहरूको उपचार गरिरहेका छन् ।
डा. झाङले भने, ‘विपद्पछि छालासम्बन्धी समस्या निकै सामान्य हुन्छ । कहिलेकाहीँ पेट दुख्ने, माथिल्लो श्वासप्रश्वास प्रणालीमा संक्रमण हुने, मोच आउने, चोटपटक लाग्ने, छालामा रगत बग्ने, घाउ हुनेलगायतका समस्या पनि देखिन्छन् ।’
बाढी र पहिरोका कारण विस्थापित हजारौँ मानिस अस्थायी आश्रयस्थलमा नयाँ परिस्थितिसँग जुध्दै जीवन सामान्य बनाउने प्रयास गरिरहेका छन् ।
कठिन परिस्थितिका बीच उनीहरूले आफू र आफ्ना आफन्तहरू सकुशल रहेकोमा केही राहत भने महसुस गरिरहेका छन् ।
प्रतिक्रिया