एसएस राजामौलीको ‘वाराणसी’ ५० भाषामा, एकैपटक १२० देशमा हुनेछ रिलिज

हैदारावाद । नमित मल्होत्राको ‘रामायण’ र एसएस राजामौलीको ‘वाराणसी’ देशका आगामी सबैभन्दा ठूला चलचित्रहरूमध्ये दुई हुन् । दुवै चलचित्रका निर्माताहरूले तिनलाई विश्वव्यापी स्तरमा प्रदर्शन गर्ने योजना बनाएका छन् ।

रणवीर कपुरको ‘रामायण’ ४५ वटा भाषामा डब गरिँदै गर्दा राजामौलीले आफ्नो परियोजना अझ धेरै भाषाहरूमा प्रदर्शन गर्ने योजना बनाएका छन् । यसका लागि, उनले एआईमा भर पर्नुको सट्टा १,५०० भन्दा बढी डबिङ कलाकारहरूको अडिसन लिने योजना बनाएका छन् र चलचित्र विभिन्न भाषाहरूमा डब गरेर प्रदर्शन गर्ने उदेश्यले यो अडिसन लिन लागेका हुन् ।

‘मिड डे’को एक रिपोर्ट अनुसार राजामौलीले ‘वाराणसी’ लाई विश्वभरका १२० देशहरूमा प्रदर्शन गर्ने योजना बनाएका छन् । हालसम्म, शाहरुख खान अभिनित ‘पठान’ले १०० भन्दा बढी देशहरूमा प्रदर्शन भई भारतीय चलचित्रको सबैभन्दा ठूलो रिलिजको कीर्तिमान कायम गरेको छ । यद्यपि, राजामौली आफ्नो चलचित्रलाई अझ व्यापक रूपमा प्रदर्शन गर्ने योजना मात्र बनाइरहेका छैनन्, बरु यसलाई स्थानीयकरण पनि गर्दैछन्, यसको अर्थ ‘वाराणसी’लाई ती सबै देशका स्थानीय भाषाहरूमा डब गरिनेछ ।

समाचार अनुसार राजामौलीले ‘वाराणसी’लाई ५० वटा भाषामा रिलिज गर्ने योजना बनाइरहेका छन् । एआई वा कृत्रिम आवाजको प्रयोग गर्नुको सट्टा उनले वास्तविक ‘भ्वाइस ओभर’ कलाकारहरूबाटै चलचित्रको डबिङ गराउने योजना बनाएका छन् । राजामौली प्रत्येक पात्रको आवाज वास्तविक र स्वाभाविक होस् भन्ने चाहन्छन्, ताकि उनीहरूको भावना, व्यक्तित्व र मनसाय विभिन्न भाषाका दर्शकहरूसम्म प्रभावकारी रूपमा पुग्न सकोस् ।

उनी विश्वभरका हरेक बजारका दर्शकहरूले यो चलचित्रलाई मूल भाषामा हेर्दा जस्तो अनुभव गर्छन्, त्यस्तै अनुभव गर्न सकून् भन्ने चाहन्छन् । त्यसैले उनीहरूले सबै ५० भाषाहरूका लागि डबिङ कलाकारहरूलाई आबद्ध गर्ने योजना बनाएका छन् । यसका लागि निर्माताहरूले चाँडै नै विश्वभरबाट १,५०० जना भ्वाइस ओभर कलाकारहरूको अडिसन लिनेछन् ।

यसैबीच, रणवीर कपुर अभिनित ‘रामायण’ विभिन्न देशहरूमा ४५ भाषाहरूमा प्रदर्शन गरिनेछ । सुरुमा, चलचित्रको डबिङका लागि निर्माताहरूले एआईको प्रयोग गरेको अनुमान गरिएको थियो । तर, निर्माता नमित मल्होत्राले ‘ईटी नाउ’सँगको अन्तर्वार्तामा व्यक्तिगत रूपमा यो दाबीको खण्डन गरेका थिए । उनले स्पष्ट पारेका छन् कि उनीहरूले हरेक भाषामा डबिङका लागि वास्तविक भ्वाइस ओभर कलाकारहरूलाई समावेश गरिएका थिए जबकी रणवीर कपुरले आफ्ना संवादहरू आफैं डब गरेका थिए ।

नमितले यो पनि उल्लेख गरे कि सबै भाषामा कलाकारहरूको आवाज पूर्ण रूपमा मेल खाओस् भन्ने सुनिश्चित गर्न उनीहरूले ‘ब्रह्मा एआई’को लिप सिंक प्रविधि प्रयोग गरेका थिए ।