पिताको निधनपछिको पहिलो खेलमा गोल हान्दा मेस्सी बने भावुक

काठमाडौं । बुवाको निधनपछि लियोनल मेस्सीले इन्टर मियामीका लागि पहिलो गोल गरेका छन् ।

फिलाडेल्फिया युनियनविरुद्धको एमएलएसखेलमा मेस्सीले गरेको २६ औं मिनेटको यो गोल उनका बुवा जर्जको अगस्ट ८ मा भएको निधनको ११ दिनपछि गरिएको हो ।

आफ्ना बुवाको निधनपछि पहिलो गोल गर्दै मेस्सीले आकाशतर्फ औंल्याएर श्रद्धाञ्जली अर्पण गरेका थिए । बुधबार फिलाडेल्फिया युनियनविरुद्धको मेजर लिग सकर खेलमा इन्टर मियामी २–२ को बराबरीमा रोकिनु परेको थियो ।

अर्जेन्टिनी सुपरस्टार मेस्सीले खेलको २६ औं मिनेटमा आफ्नो विशिष्ट शैलीको ‘कर्लिङ’ बायाँ खुट्टाको प्रहारमार्फत बललाई पोस्टको टाढाको कुनामा छिराउँदै मियामीलाई २–१ को अग्रता दिलाएका थिए ।

मियामीको पहिलो गोलमा मेसीको महत्त्वपूर्ण भूमिका थियो । उनले बायाँतर्फबाट अघि बढेका उरुग्वेली फरवार्ड लुइस सुआरेजलाई बल उपलब्ध गराएका थिए र सुआरेजले हेडरमार्फत मिलाइ दिएको बललाई युवा अमेरिकी खेलाडी ड्यानियल पिन्टरले नजिकैबाट गोलमा परिणत गरे ।

त्यसो त ३९ वर्षीय मेसी १३ गोलसहित लिगको सर्वाधिक गोलकर्ताको सूचीमा दोस्रो स्थानमा उक्लिएका छन् । उनी क्रोएसियाली खेलाडी पेटार मुसाभन्दा तीन गोलले पछाडि छन् । मुसाले बुधबार रियल साल्ट लेकविरुद्ध डलासको ४–३ ​​को जितमा दुई गोल गरेका थिए ।

आफ्ना बुवाको निधनपछि अर्जेन्टिनाबाट फर्किएयता खेलेका दुई खेलमा मियामीका यी प्रमुख खेलाडी गोल गर्न असफल भएका थिए । तर, पिताको निधनपछि पहिलो गोल गरेपछि मेस्सीको अनुहार निकै भावुक देखिएको थियो ।

‘हामी जित्नका लागि आएका थियौँ तर सफल हुन सकेनौँ,’ मियामीका प्रशिक्षक गुइलेर्मो होयोसले भने, ‘हामी बराबरीको नतिजाबाट खुसी छैनौँ किनभने हामीलाई यो मन पर्दैन तर अब हामीले आराम गर्ने र अर्को खेलबारे सोच्ने प्रयास गर्नुपर्छ, जुन ७२ घण्टाभन्दा कम समयमै हुँदैछ ।’ उनले भोलि अर्थात शनिबार टोरन्टो एफसीसँग हुने खेललाई लक्षित गर्दै भनेका थिए ।