गरिमा विकास बैंकको केन्द्रीय कार्यालय अब बालुवाटारमा

काठमाडौं । गरिमा विकास बैंक लिमिटेडको काठमाडौं महानगरपालिका–३, बालुवाटारस्थित नवनिर्मित केन्द्रीय कार्यालयको आज (बुधबार) विधिवत रुपमा उद्घाटन भएको छ । विकास बैंकको आफ्नै स्वामित्वमा रहेको भवनमा स्थापित केन्द्रीय कार्यालयको नेपाल राष्ट्र बैंकका गभर्नर प्रा. डा. विश्वनाथ पौडेलले एक समारोहबीच उद्घाटन गरेका हुन् ।

कार्यालयको उद्घाटनसँगै हाल लाजिम्पाट, काठमाडौंमा रहेको केन्द्रीय कार्यालय बालुवाटार, काठमाडौंमा स्थानान्तरण गरिएको छ ।

२०६४ साल कात्तिक १८ गते स्याङ्जाको वालिङबाट औपचारिक रूपमा वित्तीय कारोबार प्रारम्भ गरेको विकास बैंकले २०६७ साल वैशाख १ गते कास्कीको महेन्द्रपुलमा केन्द्रीय कार्यालय स्थानान्तरण गरेको र राष्ट्रियस्तरको विकास बैंकमा स्तरोन्नति भएपश्चात २०७३ साल चैत २७ गते आफ्नो केन्द्रीय कार्यालय पोखराबाट काठमाडौंको लाजिम्पाटमा स्थानान्तरण गरेको थियो ।

नवनिर्मित केन्द्रीय कार्यालयको उद्घाटनको कार्यक्रमको अवसरमा कार्यालय परिसरमा निर्मित मन्दिरमा शिव पाञ्चायन प्राण प्रतिष्ठा सहित धार्मिक पूजाआजा समेत आयोजना गरिएको थियो ।

उद्घाटन समारोहमा नेपाल राष्ट्र बैंकका गर्भनर प्रा. डा. विश्वनाथ पौडेलसँगै धितोपत्र बोर्डका अध्यक्ष डा. गोपालप्रसाद भट्ट, नेपाल राष्ट्र बैंक लगायत अन्य नियमनकारी निकायका पदाधिकारीहरु, गरिमा विकास बैंकका सञ्चालक समितिका सदस्यहरु, विकास बैकका पूर्व पदाधिकारीहरु, उच्च व्यवस्थापन पदाधिकारीहरु, विभिन्न बैंक तथा वित्तीय संस्थाका प्रमुख कार्यकारी अधिकृतसहित उच्च पदस्थ पदाधिकारीहरु, विकास बैंकका शेयरधनीहरु, कर्मचारीहरु, ग्राहकहरु लगायतको उल्लेख्य उपस्थिति रहेको थियो ।

कार्यक्रममा बोल्दै विकास बैंकका प्रमुख कार्यकारी अधिकृत माधवप्रसाद उपाध्यायले २०६४ सालमा स्याङ्जाको वालिङबाट सुरु भएको यात्रा पोखरा हुँदै २०७३ सालमा काठमाडौं आइपुगेकोमा आफ्नै स्वामित्वको भवनमा केन्द्रीय कार्यालय सञ्चालनमा आएसँगै विकास बैंकको अर्को अध्याय सुरु भएको बताए । साथै, उनले विकास बैंकको सफल व्यावसायिक यात्रामा लाखौं ग्राहक, हजारौं शेयरधनी, नियमनकारी निकायहरु, व्यावसायिक साझेदार संस्थाहरुको विश्वास सँगै कर्मचारीहरुको कठोर मेहनत र योगदान तथा संस्थागत सुशासन महत्वपूर्ण रहेको उल्लेख गरे ।

त्यसैगरी, उद्घाटन समारोहको समापन सत्रमा बोल्दै विकास बैंकका अध्यक्ष दिलिपप्रताप खाँणले ग्राहकलाई थप सहज, प्रभावकारी तथा गुणस्तरीय बैंकिङ सेवा प्रदान गर्दै संस्थागत सुशासन, प्रविधि, नवप्रवर्तन र दिगो विकासलाई प्राथमिकतामा राखी आगामी दिनमा अझ सशक्त रूपमा अघि बढ्ने प्रतिवद्धता व्यक्त गरे ।

हाल गरिमा विकास बैंकले देशभर १२६ शाखा कार्यालयसहित ५१ एटिएम मेसिन एवं नविनतम बैंकिङ सुविधासहित करिब १० लाख ग्राहकहरुलाई सरल सुरक्षित र गुणस्तरीय सेवा प्रदान गर्दै आइरहेको छ ।