प्रभासको ‘स्पिरिट’मा कट्रिनाको पनि इन्ट्री

हैदारावाद । दक्षिण भारतीय सुपरस्टार प्रभासको आगामी चलचित्र ‘स्पिरिट’ हाल चर्चामा रहेको छ ।

केही महिनाअघि दीपिका पादुकोणले यो परियोजना छोडेपछि तृप्ति डिमरी र प्रभासको जोडी बन्ने बाटो खुलेको थियो ।

यसैबीच, एउटा ठूलो खबर बाहिर आएको छ, जसले प्रशंसकहरूमाझ निकै उत्साह जगाएको छ । अब अभिनेत्री कट्रिना कैफ पनि यस चलचित्रमा जोडिने भएकी छिन् ।

डेक्कन हेराल्डको एक रिपोर्ट अनुसार चलचित्र निर्माताहरूले क्याट्रिना कैफसँग छोटो तर प्रभावशाली भूमिका अर्थात क्यामियोका लागि कुराकानी गरिरहेका छन् । यद्यपि चलचित्रमा उनको उपस्थिति छोटो समयका लागि मात्र भए पनि उनले सशक्त भूमिका निर्वाह गर्नेछिन् । यदि क्याट्रिनाले यस चलचित्रमा काम गरिन् भने यो उनका प्रशंसकहरूका लागि विशेष उपहार हुनेछ ।

विवाहपछि उनी ठूलो पर्दामा कमै देखिएकी छिन् र उनका हालैका केही चलचित्रहरूले बक्स अफिसमा राम्रो प्रदर्शन गर्न सकेका छैनन् । त्यसैले, ‘स्पिरिट’ उनका लागि एउटा महत्त्वपूर्ण चलचित्र सावित हुनसक्छ । यद्यपि, यस विषयमा न त क्याट्रिना न त निर्माताहरूले नै अहिलेसम्म कुनै आधिकारिक घोषणा गरेका छन् ।

यहाँ उल्लेख गर्नुपर्ने कुरा के छ भने, सन्दीप रेड्डी वांगाद्वारा निर्देशित यस चलचित्रमा सुरुमा मुख्य भूमिकाका लागि दीपिका पादुकोणलाई लिने तय गरिएको थियो । तर, ‘न्यूज १८ शोशा’का अनुसार उनले निर्माताहरूसँग ८ घण्टाको सिफ्ट र २५ करोड रुपैयाँ पारिश्रमिक र चलचित्रको नाफाको १० प्रतिशत हिस्साको माग गरेकी थिइन् । फलस्वरूप, वार्ता सफल हुन सकेन र उनी यस परियोजनाबाट बाहिरिएकी थिइन् । त्यसपछि उक्त भूमिकाका लागि तृप्ति डिमरीलाई छनोट गरियो र उनले दीपिकाको तुलनामा कम पारिश्रमिक लिइरहेकी छिन् ।

कट्रिनाले लगभग २० वर्ष पहिले तेलुगु फिल्महरूमा काम गरेकी थिइन् । ‘मल्लीस्वरी’मा वेंकटेश र ‘अल्लारी पिडुगु’मा नन्दमुरी बालकृष्णसँग अभिनय गरिन् । पछि उनी बलिउड फिल्महरूमा सक्रिय भइन् र अन्तिमपटक २०२४ मा विजय सेतुपतिसँगै फिल्म ‘मेरी क्रिसमस’मा देखिएकी थिइन् ।